Il-President tal-organizzazzjoni Repubblika, Robert Aquilina, kiteb lill-Ministru għall-Intern u s-Sigurtà Nazzjonali, Byron Camilleri biex jieħu passi konta d-Direttur għall-Istudji fl-Akkademija tal-Forzi Dixxiplinati ta’ Malta.
Dan wara li John Cassar Ellul, fuq Facebook, inċita lill-pubbliku biex “jitfa’ bajd u tadam” lejn id-Deputati tal-Partit Nazzjonalista meta jkunu ħierġa mill-Parlament.
Fl-ittra, Aquilina saħaq li dan l-aġir huwa “inaċettabbli” aktar u aktar għax qed isir minn persuna responsabbli mit-taħriġ tal-Pulizija, is-suldati u l-membri tal-Korpi Dixxiplinati.
“Ma jistax ikun li min għandu fdat f’idejh it-taħriġ tal-membri tal-korpi dixxiplinati tagħna jġib ruħu b’dan il-mod xokkanti,” saħaq Aquilina.
Għalhekk talab lill-Ministru biex jieħu passi biex il-Gvern jagħmilha ċara li dan l-aġir mhuwiex wieħed aċċettabbli.
L-ittra ġiet mibgħuta wkoll lill-Prim Ministru Robert Abela.