Il-Partit Nazzjonalista ppreżenta sensiela ta' proposti għall-isports fosthom li jkun hemm Ministru ddedikat lill-isport u anke inqas ta' taxxa għall-isportivi professjonali. Apparti skemi u fondi nazzjonali biex jgħinu lill-atleti professjonali, il-PN irid li jinfetaħ ukoll stazzjon televiżiv nazzjonali free-to-air li jxandar esklussivament l-isport
"Gvern Nazzjonalista se jkun jimpenja ruħu bis-sħiħ li jwettaq aġenda mill-aktar intensiva biex l-atleti żgħażagħ tagħna, kemm jekk stabbiliti jew professjonali u kemm jekk le, ikunu jistgħu jiksbu eċċellenza jew avvanz fl-isport bħala parti integrali mill-avvanz tas-soċjetà u tal-ekonomija tagħna," saħaq il-PN.
F’konferenza tal-aħbarijiet il-kandidati għall-Elezzjoni Ġenerali Graham Bencini u Christian Micallef ħabbru pakkett ta’ proposti li Gvern Nazzjonalista se jkun qed jimplimenta f’każ li jkun fil-Gvern. Fost il-proposti hemmm dawn:
- Jingħata status Ministerjali lill-isport u jiġi meqjus bħala settur ekonomiku ewlieni.
- Titwaqqaf entità speċifika biex tattira l-avvenimenti sportivi lejn Malta
- Jinħoloq il-Kampus Malti tal-Innovazzjoni Sportiva
- Tinfetaħ faċilità fiċ-ċentru ta’ Malta għall-indoor sports, li b’mod speċifiku tospita firxa usa ta’ dixxiplini sportivi
- Tinbena Futsal Arena ġdida
- Issir it-Trakka ta’ Ħal Far
- Appoġġ b’saħħtu lill-formazzjoni sportiva tat-tfal
- Insaħħu l-Iskola Nazzjonali tal-Isport
- Ħidma biex Malta tingħata t-titlu prestiġjuż ta’ Belt jew Gżira Ewropea tal-Isport
- Appoġġ lill-atleti ta’ l-iSpecial Olympics
11. Il-PN qed jipproponi wkoll miżuri fiskali ġodda biex jingħata appoġġ finanzjarju tal-isport
Fost dawn il-PN qed jipproponi skemi biex il-kumpaniji u l-individwi li jisponserjaw lil xi klabb jew assoċjazzjoni sportivi konformi mal-ESG ikunu eliġibbli għal kreditu tat-taxxa ta’ 50% sa €50,000 fis-sena biex jinħoloq sors ġdid ta’ finanzjament f’dan is-settur.
12. Jipproponi wkoll inqas taxxa fuq id-dħul għall-isportivi professjonali
Il-persuni rreġistrati bħala plejers, atleti, kowċis, amministraturi tal-attivitajiet sportivi u dawk li jħarrġu f’xi dixxiplini sportivi jkunu eliġibbli għal rata tat-taxxa ta’ 5% fuq l-ewwel €80,000 dħul tagħhom.
13. Kreditu ta’ taxxa għal leave speċjali għall-atleti li jipparteċipaw f’kompetizzjonijiet internazzjonali
Sabiex jiġi inċentivat aktar appoġġ lill-atleti li jipparteċipaw f’kompetizzjonijiet barra minn pajjiżna, ser jingħata kreditu ta’ taxxa lil min iħaddem biex ikopri l-ispiża sħiħa tal-leave speċjali li jagħtu lill-atleti għal dan il-għan.
Fl-aħħar jiem, biex aktar żgħażagħ jidħlu fid-dinja tal-isport, il-PN qed jipproponi wkoll:
- Għotja ta’ €500 lin-nurseries jew tal-akkademji li huma konformi mal-ESG għal kull tifel jew tifla, żagħżugħ jew żagħżugħa sa 18-il sena li jipparteċipaw fi programm strutturat ħalli b’hekk ikunu jistgħu jwettqu investiment kapitali u jsaħħu l-istaff tekniku.
- Appoġġ liż-żgħażagħ li jieħdu sehem fl-attivitajiet sportivi internazzjonali billi l-vawċer tal-ivvjaġġar ta’ €500 għaż-żgħażagħ ikun jista’ jintuża wkoll għal skop ta’ vvjaġġjar sportiv biex ikollhom esperjenzi ta’ taħriġ jew kompetizzjonijiet internazzjonali.
- Ikun assigurat li l-ispejjeż kollha tal-isport extra-kurrikulari li jħallsu l-ġenituri għal uliedhom jitnaqqsu mill-introjtu taxxabbli tal-ġenituri.
- Għotja ta’ €300 kull sena lill-ġenituri tal-istudenti sa 18-il sena li jieħdu sehem fi programm strutturat tal-isport estra-kurrikulari li jkun irreġistrat ma’ assoċjazzjoni konformi mal-ESG tal-għażla tagħhom.
- Jiżdied in-numru ta’ lezzjonijiet tal-edukazzjoni fiżika fil-ġimgħa matul l-edukazzjoni obbligatorja, u nżidu l-kumpliment li jirċievu l-għalliema tal-edukazzjoni sportiva.
Bi tħejjija għall-GSSE 2023, il-PN qed jipproponi wkoll li jiżdied il-baġit allokat għal-Logħob tal-Pajjiżi ż-Żgħar f’Malta (2023) b’€2 miljun ħalli tissaħħaħ it-tħejjija tal-atleti Maltin fl-għaxar dixxiplini sportivi: l-atletika, il-basketball, il-judo, ir-rugby, l-ibburdjar, l-isparar, l-isquash, l-għawm, it-table tennis u t-tennis.
Iwiegħed ukoll finanzjament ewlieni għall-prestazzjoni professjonali u Olimpika u anke t-twaqqif ta' fond li jgħin l-atleti Maltin jiksbu. suċċess f’kompetizzjonijiet internazzjonali. Dan il-fond ikun ta' €1 miljun kull sena li jiġi allokat skond parametri stabbiliti minn Sport Malta.
Il-PN se jkun qed jinvesti fi skema ġdida ta’ fondi għall-ivvjaġġar sportiv biex jingħata appoġġ lill-assoċjazzjonijiet u l-klabbs sportivi fl-avvenimenti sportivi internazzjonali. Għal dan il-fond ikun allokat €1 miljun kull sena.
