Kunsilliera, residenti ta’ Wied il-Għajn u anke l-Moviment Graffitti, talbu lill-Awtorità Maltija għat-Turiżmu (MTA) biex iwaqqfu dak li qed tissejjaħ bħala “design contest” bil-għan li Wied il-Għajn isir aktar attraenti għal dawk li jżuruh. Insistew li qed isiru laqgħat sigrieti u hemm motivi ulterjuri bejn l-iżviluppaturi u Infrastructure Malta.
Riċentament, periti, enġiniera u anke żviluppaturi kienu mistiedna jieħdu sehem f’din il-kompetizzjoni biex jipproponu kif Wied il-Għajn jista’ jsir aktar attreanti għat-turisti.
Dan xejn ma niżel tajjeb mar-residenti, partikolarment fid-dawl tal-fatt li dawn diġà ġew milquta minn diversi proġetti kbar kostruzzjoni.
Andre Callus, mill-Moviment Graffitti, ħeġġeġ lill-MTA biex immedjatament iwaqqfu din il-kompetizzjoni għax fi kliemu din hija biss “cover-up” ta’ pjanijiet li diġà saru minn wara dahar ir-residenti.
Ir-resident u l-kunsillier John Baptist Camilleri, li indirizza wkoll il-konferenza, semma proposta għall-pitch tal-waterpolo, li fi kliemu se jkun it-tielet wieħed f’Wied il-Għajn u li ġie approvat minn wara dahar ir-residenti.
Staqsa wkoll għaliex kellu jitwaqqaf sottokumitat għar-riġenerazzjoni ta’ din iż-żona mingħajr l-ebda termini ta’ referenza. Fil-fatt, tul il-konferenza ntqal li madwar sena ilu, is-sindku ħabbar sottokumitat għar-riġenerazzjoni ta’ Wied il-Għajn. Il-membri ta’ dan is-sotto-kumitat intgħażlu mis-sindku nnifsu u kienu ilhom jiltaqgħu u jaħdmu fuq proposti varji għal Wied il-Għajn sentejn sħaħ “minn wara dahar il-poplu.”
Tul il-konferenza, ntqal kif il-membri ta’ dan is-sottokumitat kienu s-Sur Ray Abela, il-kuġin tiegħu, Eric Abela, "b’interessi kummerċjali fil-pjazza ta’ Wied il-Għajn," Joseph Farrell, "ukoll b’interessi kummerċjali fil-pjazza ta’ Wied il-Għajn," Angele Abela, kap tas-segretarjat ta’ Ministru, u s-sindku nniffsu.
Allega li hemm “manuvri” bejn dan is-sottokumitat u Infrastructure Malta biex ikun hemm bidliet sostanzjali fi Pjazza Sant’Anna, fost oħrajn.
Saħaq li l-Kunsill Lokali qed ikun infurmat biss wara li dawn il-proġetti jkunu ġew iffinalizzati. Insista li s-sottokumitat mhux qed jilqa’ s-suġġerimenti tal-esperti u qed jirrifjuta li jiltaqa’ magħhom.
Camilleri għamel ukoll referenza għall-proġett kontroversjali tal-Jerma Palace u anke taż-Żonqor Point u ħeġġeġ lill-awtoritajiet biex jibżgħu għal Wied il-Għajn u ma jarmuhx.
Tkellmu wkoll numru ta’ residenti. Insistew li huma jaqblu mar-riġenerazzjoni tal-lokalità li fiha jgħixu, iżda saħqu li r-residenti qed ikunu injorati.
Insistew li l-iżvilupp qed ikun immirat għat-turisti u mhux għar-residenti u dan qed iwassal għall-qerda tal-identità ta’ Wied il-Għajn.
“Wied il-Għajn ma għandu bżonn l-ebda żvilupp. Ir-residenti u t-turisti jriduh kif inhu,” saħqet Theresa Hogan waqt li insistiet li r-residenti qed jibżgħu li jiġri l-istess li ġara lil Tas-Sliema.
Residenti oħrajn ilmentaw fuq il-parkeġġ u kif l-ispazji pubbliċi qed jispiċċaw meqruda, mingħajr l-ebda attenzjoni mogħtija għall-anzjani u persuni b’diżabilità.
Is-Soċjologu Godfrey Baldacchino, li wkoll indirizza l-konferenza, fakkar li l-Prim Ministru huwa residenti ta’ Wied il-Għajn, iżda saħaq li dan xorta waħda wassalx biex il-lokalità tkun protetta.
Insista li ftit ftit, il-kwalità tal-ħajja tar-residenti qed titnaqqar.
“Miż-Żonqor sal-Jerma hemm pjanijiet biex ftit jistagħnew il-ftit minn fuq il-ħafna,” temmew jisħqu l-attivisti fil-konferenza.
