Il-Ministru Caruana jħabbar li l-Gvern se jinforza l-liġi kontra dawk li ma jħaddmux persuni b'diżabilità
Jgħid li ġieli marru għandu persuni li akkost ta' kollox ma ridux iħallsu kontribuzzjoni talli ma ħaddmux persuni b'diżabilità
minn Albert Gauci Cunningham
.jpg)
Il-Minstru tal-Finanzi Clyde Caruana qal fil-Parlament, hekk kif bdiet id-diskussjoni dwar l-Att dwar l-Impjieg ta' Persuni b'Diżabilità, illi l-Gvern se jkun qed jara li l-Liġi li timponi kwoti ta' persuni b'diżabilità fuq il-post tax-xogħol, tkun infurzata, speċjalment f'każi fejn min iħaddem jibqa' jirrifjuta li jħallas il-kontribuzzjoni ta' €2,400 għal kull persuna b'diżabilità li suppost iħaddem u mhuwiex.
Din il-liġi tal-1969 - imma li l-Gvern iddeċieda li jinforza fl-2015 - titlob li kull post tax-xogħol ikollu 2% tal-ħaddiema li jkunu persuni b'diżabilità. F'każ fejn min iħaddem ma jkunx irid jew ma jkunx jista' jimpjega persuni b'diżabilità titħallas il-kontribuzzjoni - li titla' għal massimu ta' €10,000. Il-Ministru qal illi sal-lum il-ħlas ta' din il-kontribuzzjoni għadha mhix infurzata, xi ħaġa li l-Gvern qed jara li jbiddel permezz ta' dan l-Att.
Il-Ministru Caruana rrakkonta kif ġieli marru kellmuh persuni li jmexxu kumpaniji li għandhom dħul ta' €30 miljun kull sena imma li jgħidulu illi akkost ta' kollox ma jridux iħallsu din il-kontribuzzjoni. "Din hija attitudni li tweġġgħani u jeħtieġ tinbidel," temm isostni.
