Eġizzjan ta’ 34 sena, tressaq il-Qorti akkużat li għen numru ta’ persuni sabiex jiddaħħlu Malta illegalment. Mill-investigazzjonijiet tal-Pulizija tat-Taqsima tal-Immigrazzjoni, jirriżulta li l-Eġizzjan kien ukoll strumentali sabiex isir il-vjaġġ bejn il-Libja u Malta.
Il-każ seħħ nhar id-19 ta’ Frar,2021, meta l-Pulizija ġiet infurmata li fl-inħawi ta’ bejn Wied iż- Żurrieq u Għar Lapsi, kien hemm grupp ta’ persuni, aktarx immigranti.
Il-pulizija marru mill-ewwel fuq il-post, fejn sabu tmint irġiel. L-immigranti ddaħlu Malta permezz ta’ speed boat mil-Libja, liema speed boat instabet abbandunata xi jiem wara.
Il-Pulizija mit-Taqsima tal-Immigrazzjoni komplew bl-investigazzjonijiet u minn iżjed stħarriġ irriżulta li l-Eġizzjan ta’ 34 sena kien saq l-ispeed boat u anke kien fost it-tmint irġiel li ġew arrestati dakinhar stess.
L-Eġizzjan wieġeb mhux ħati u ma ngħatax il-ħelsien mill-arrest.
Il-Prosekuzzjoni qiegħda titmexxa mill-Ispettur Karl Roberts.