Is-suppliment tal-Paga li se jkun estiż għal xahar se jitbiddel xi ftit minn kif inhu bħalissa u dawn il-bidliet se jitħabbru f'Ottubru fil-Baġit. Dan ħabbru l-Ministru tal-Ekonomija Silvio Schembri li kien qed jirrispondi mistoqsijiet wara Konferenza tal-Aħbarijiet illi fiha ta' dettalji dwar l-iskema tal-vouchers.
Schembri ħabbar illum illi sa issa għad fadal 30,000 persuna li ma ġabrux il-vouchers u qal ukoll illi din l-iskema - illi ħafna sidien ta' negozji faħħruha u qalu illi dawwret ir-rota matul dawn il-ġimgħat diffiċli - swiet lill-Gvern €44.6 miljun. B'kollox inħarġu 440,000 settijiet ta' vouchers li jgħoddu għal 2.3 miljun voucher ta' 20 ewro.
Dwar is-Suppliment tal-Pagi l-Ministru Schembri qal illi l-Gvern mhux qed iħares lejn l-apsett finanzjarju daqs kemm qed iħares lejn kemm jista' l-pajjiż jiggwadanja minn din l-iskema. Ma rridux li nkunu għaddejna dawn ix-xhur u dan il-perjodu illi fih ħallasna ammonti sostanzjali f'dan is-suppliment u l-pajjiż ikun ħa ftit li xejn lura." Hu iżda ma elaborax aktar dwar dan.
Ilbieraħ il-PM Robert Abela ħabbar illi l-iskema li permezz tagħha eluf ta' ħaddiema bdew jingħataw suppliment ta' €800 jew €500 - speċjalment f'dawk is-setturi li ħadu l-akbar daqqa mill-pandemija - se tkun estiża.