Il-governanza tajba, it-tkabbir ekonomiku, l-edukazzjoni, it-titjieb tal-infrastruttura tal-pajjiż u l-mira li Malta ssir carbon-neutral sal-2050, huma l-pilastri tal-politika ekonomika tal-Gvern.
Ħabbar dan il-Prim Ministru Robert Abela waqt laqgħa tal-Kabinett li saret fil-Kamra tal-Kummerċ fil-Belt Valletta.
Insista li l-għan aħħari huwa li dan kollu jtejjeb il-ħajja tan-nies.
“X’jiswa li jkollok it-tkabbir ekonomiku u l-kwalità tal-ħajja tibqa’ l-istess?”, staqsa l-Prim Ministru.
Il-kabinett qed jistudja studju li sar riċentament mill-Kamra tal-Kummerċ u li jiffoka fuq l-iżvilupp ekonomiku wara l-pandemija.
Waqt li tkellem dwar il-kritika li qala' fl-aħħar jiem wara ż-żieda fil-każi tal-Covid-19, il-Prim Ministru qal li d-deċiżjoni li jitħassru ċertu parties li kienu se jattiraw eluf ta’ nies, kienet deċiżjoni li ttieħdet fl-interess tas-saħħa pubblika.
Madanakollu ċaħad suġġerimenti li l-aħħar mewġa ta’ każi kienet riżultat ta’ deċiżjonijiet tal-Gvern biex jirilaxxa miżuri qabel iż-żmien.
Min-naħa tiegħu, il-President tal-Kamra tal-Kummerċ, David Xuereb, appella lill-Gvern biex jippjana l-istrateġija ekonomika għall-ħames snin li ġejjin għax in-negozji għandhom bżonn direzzjoni.