Fl-aħħar 24 siegħa - apparti li s-seba' persuna tilfet ħajjitha minħabba l-Covid-19 - sitt persuni fiequ mill-istess virus waqt li kien hemm każ wieħed biss ġdid ta' coronavirus minn total ta' 1,247 test.
Il-każ kien ta' persuna fl-Isptar Monte Carmeli li kellu sintomi ta' qtugħ ta' nifs, fost oħrajn. Bħalissa qed isir ittestjar ta' nies li kienu fl-istess ward ma' din il-persuna.
Is-Supretendent tas-Saħħa Pubblika Charmaine Gauci qalet illi bħalissa hemm 28 persuna li qegħdin l-isptar: 11 qegħdin l-Isptar Boffa, ħamsa qegħdin l-Isptar St. Thomas, erba' fl-Infectious Diseases Unit ta' Mater Dei, ħamsa oħrajn l-isptar Mater Dei, wieħed fl-Isptar Monte Carmeli u tnejn oħrajn f'wards differenti fl-Isptar Mater Dei. Hija qalet li dan mhux neċessarjament ifisser li dawn qegħdin f'sitwazzjoni ħażina ta' saħħa imma jista' jkun ukoll biex ma jagħmlux kuntatt ma' persuni oħra fl-istess dar li huma vulnerabbli wkoll.
Minn dawk li mietu sa issa, il-maġġoranza kellhom iktar minn 80 sena b''Gauci tgħid li l-Covid-19 fil-fatt jista' ma jkunx il-kaġun ewlieni tal-mewt iżda jkun fattur li jiggrava problemi ta' saħħa diġa' eżistenti.
Dwar iċ-ċelebrazzjonijiet li saru fil-Furjana Gauci qalet illi minn għada se jkun hemm min jagħmel test u ssir evalwazzjoni tas-sitwazzjoni u jekk setax kien hemm trażmissjoni. Fakkret illi minkejja sitwazzjoni stabbli, attivitajiet tal-massa għandhom ikunu evitati.
