Meta kien qed jindirizza Konferenza tal-Aħbarijiet il-Prim Minisrtru ħabbar illi minn nhar il-Ġimgħa se jkomplu jiżdiedu servizzi tas-saħħa, jiftħu l-well baby clinics, se tiżdied il-kura tas-saħħa mentali, se jiżdiedu aktar operazzjonijiet - anke dawk mhux daqstant urġenti. Se jiftaħ is-servizz tal-IVF, filwaqt li dawk li jkunu fi gruppi minn issa 'l quddiem jistgħu jkunu f'mhux aktar min sitta minn nies.
Il-Gvern iddeċieda wkoll illi sports fuq barra jista' jerġa jibda filwaqt li taħriġ jista' jsir - basta fi gruppi ta' sitta biss.
Se jiftħu wkoll ir-ristoranti - b'regoli speċifiċi kif ukoll se jiftħu il-hairdressers, beauticians, nail technicians u Lidos.
Fil-kummenti tal-ftuħ il-Prim Ministru qal li n-normalità hija xi ħaġa li ħafna jridu. "Jiena ma nistax nagħmel il-ġimgħat magħluqin - jiġifieri l-emerġenza - in-normalità. Li nħallu kollox magħluq, li taħdem mid-dar, li ma tistax tmur f'ristorant jew tagħmel xagħarek mhijiex in-normalità," qal il-PM li sostna li dawn il-miżuri mhumiex kompromess bejn ekonomija li se tikkrolla jew le. "Hija x-xjenza li qed turina dan. M'aħniex nagħmlu kompromsessi ma' saħħet il-poplu u nħarbtu dak kollu li akkwistajna ... huma l-fatti mediċi li qed juruna bil-fatti li nistgħu nkomplu nimxu fit-triq tan-normalità."
Abela fakkar illi Malta għandha rata baxxa ħafna ta' każi attivi u l-Gvern ħaseb għal kull kontinġenza - għall-agħar sitwazzjoni possibbli. "Dawn huma fatti u ma jagħmilx sens inħallu pajjiż sħiħ magħluq. Aħna niddeċiedu fuq il-ħsieb razzjonali mhux fuq il-biża'. Meta kien hemm bżonn nieħdu deċiżjonijiet iebsin għamilnieha għax hekk kienet tiddetta s-saħħa pubblika."
Huwa qal li pajjiżna ma ġiex għarkopptejh "għax konna nafu x'inhu ġej" u ammetta li l-Gvern se jkun qed jaqla' l-kritka għalkemm qal illi dak li qed iħabbar qed isir bi protokolli biex dawn l-attivitajiet ikunu siguri u fakkar li kulħadd għandu l-għażla jmur jew ma jmurx f'ħanut.
"Żammejna t-tsumani milli jikber"
Il-Ministru ts-Saħħa u Deputat Prim Ministru Chris Fearne qal illi grazzi għas-sagrifiċċji kollha li saru l-Gvern irnexxielu jikkontrolla t-tsunami. "Issa li żammejna dan it-tsunami milli tikber - bdejna bil-mod, il-mod niftħu bil-fehema illi kull jum li l-ekonomija tibqa' magħluqa din tpoġġi fil-periklu x-xogħolijiet. Ma nistgħux nittardjaw imma ma nistgħux ngħaġġlu wisq."
Is-Supretendent tas-Saħħa Pubblika qalet illi kull miżura li saret kienet ibbażata fuq ix-xjenza, kemm meta saru r-restrizzjonijiet kif ukoll ir-rilaxxament. "Ma nistgħux nerġgħu nkunu bħal qabel. Għalhekk irridu nobdu miżuri bbażati fuq ddistanzjar soċjali, ħasil tal-idejn u aktar."