Ħarsa lejn l-ewwel sena ta’ Presidenza f’idejn Marie Louise Coleiro Preca

Ilbieraħ ġie ċċelebrat l-ewwel anniversarju minn meta Marie Louise Coleiro Preca ħadet il-Presidenza ta’ Malta f’idejha. Sena li matulha rajna lil Coleiro Preca f’ħidma bla waqfien sabiex tressaq il-Presidenza aktar viċin in-nies.

“L-irwol tal-President m’għandux ikun biss ċerimonjali, iżda rwol li bih  nista nkompli nkun viċin il-poplu Malti kollu.” Il-President qalet dan il-kliem fl-okkażjoni ta’ l-ewwel anniversarju minn mindu bdiet tokkupa l-għola kariga fil-pajjiż.

Il-President qalet ukoll li wasal iż-żmien għal bidla fl-amministrazzjoni tal-ġudikatura u li trid tinbidel il-kostituzzjoni fejn tirreferi għar-rwol tal-President. “Il-proċess ta’ bidla għadu ma bdiex għalkemm hu fatt magħruf li din ir-riforma hi meħtieġa għall-pajjiż aktar modern.”

Mistoqsija tikkummenta dwar l-ewwel sena, il-President qalet li hi tqis li kienet sena ta’ ħidma f’oqsma differenti tas-soċjetà. “Iltqgħajt ma’ nies fil-bżonn u għint mill-aħjar li stajt sabiex nindirrizzaw il-bżonnijet li dawn in-nies kellhom. Il-ħafna li għamilna hu ftit ħdejn dak li għad hemm bżonn.”

Il-President tkellmet ukoll mal-ġurnalisti dwar l-impenji uffiċjali li jkollha ta’ kuljum u kien hawnhekk li ntqal li matul is-sena li għaddiet kellha madwar 2,500 impenn, medja ta' sitta kuljum.

Intant din il-gazzetta qed tippublika għażla ta’ ritratti li jirappreżentaw uħud mill-impenji tal-President ta’ Malta, Marie Louise Coleiro Preca matul l-ewwel sena tagħha fil-kariga.