Il-Ministru tas-Saħħa Jo Etienne Abela ħabbar li finalment se jibdew ix-xogħlijiet għall-espansjoni tad-Dipartiment tal-Emerġenza u l-bini ta’ Acute Psychiatric Unit ġdida fl-Isptar Mater Dei.
Abela qal li l-proġett se jitwettaq fuq medda ta’ tliet snin u għandu l-għan li jindirizza l-problemi relatati mal-ħinijiet twal ta’ stennija fl-Emerġenza.
Skont il-ministru, in-numru ta’ cubicles fl-Emerġenza se jiżdied minn 35 għal 70, filwaqt li se jinbnew ukoll żewġ swali ġodda.
Abela spjega wkoll li l-Acute Psychiatric Unit se tinkludi 135 sodda mqassma f’taqsimiet speċjalizzati differenti, filwaqt li s-servizzi tas-saħħa mentali se jkunu integrati mas-servizzi tas-saħħa fiżika sabiex titnaqqas l-istigma marbuta mal-kura psikjatrika.
Il-proġett jinkludi wkoll il-ħolqien tal-helpline 1400, li skont il-Gvern diġà għenet biex 15,000 każ ma jidħlux fl-Emerġenza ta’ Mater Dei.
Tħabbru wkoll servizzi ġodda bħall-First Senior Medical Contact u streaming service, flimkien ma’ preparazzjoni għal Surgical High Dependency Unit akbar u Medical High Dependency Unit ġdida.
“Kif wiegħedna, kollox lest biex jibda proġett li se jbiddel għal dejjem il-kura tal-emerġenza u s-saħħa mentali f’Malta,” qal Abela.
Huwa sostna li dan il-proġett se jkollu impatt pożittiv fuq is-saħħa pubblika għal ħafna snin li ġejjin.
It-tħabbira saret wara li fl-2024 il-Ministeru tas-Saħħa kien ħareġ sejħa għall-offerti għall-estensjoni tad-Dipartiment tal-Emerġenza u faċilità ġdida tas-saħħa mentali, bi stima inizjali ta’ madwar €80 miljun.
Madankollu, konsorzju wieħed biss magħmul minn Bonnici Brothers u CE Installations kien tefa’ offerta ta’ €136 miljun.
Il-ministeru kien ikkunsidra l-offerta bħala eċċessiva u ddeċieda li jikkanċella s-sejħa, iżda l-uniku offerent appella minn dik id-deċiżjoni u l-każ għadu pendenti.
Minkejja li l-appell għadu qed jiġi deċiż, il-Gvern għażel li jagħti l-proġett permezz ta’ negotiated procedure lill-istess konsorzju għal valur immirat ta’ €120 miljun.
Dan il-pass qajjem tħassib fi ħdan is-settur tal-kostruzzjoni, fejn hemm min jemmen li l-istima inizjali tal-ministeru kienet ferm inqas mill-valur reali tas-suq u setgħet skoraġġiet offerenti oħra milli jipparteċipaw.
Id-deċiżjoni kienet ukoll ikkritikata mill-union tat-tobba, li sostniet li l-Gvern ma kkonsultahiex dwar il-pjani marbuta ma’ outsourcing ta’ servizzi tal-Emerġenza lejn sptarijiet privati bħala parti mill-ftehim ta’ public-private partnership.
Il-Prim Ministru Robert Abela ma kienx indirizza l-kontroversja meta mistoqsi dwar il-proġett f’April li għadda, u kien qal biss li l-proċess tan-negozjati kien viċin li jiġi konkluż u li x-xogħlijiet kienu se jibdew dalwaqt.
