Riġenerazzjoni fit-tul tal-Port il-Kbir imħabbra fi proġett ta’ erba’ fażijiet

Il-Gvern nieda uffiċjalment konsultazzjoni pubblika dwar pjan strateġiku fit-tul għar-riġenerazzjoni tal-Port il-Kbir, proġett ambizzjuż li għandu l-għan li jagħti ħajja ġdida lil diversi żoni mal-kosta u siti li fl-imgħoddi kienu jintużaw għall-industrija. Din l-inizjattiva se tkun qed timxi fuq erba’ fażijiet distinti, bil-ħsieb li l-Port il-Kbir jinbidel f’żona li tgħaqqad il-wirt marittimu storiku ta’ Malta ma’ żvilupp modern u sostenibbli.

Waqt it-tnedija ta’ dan il-pjan, il-Prim Ministru Robert Abela sostna li l-viżjoni tal-gvern hija li jittrasforma l-madwar tal-port f’żona ta’ użu mħallat li tilħaq standards internazzjonali għoljin. Huwa spjega li filwaqt li l-karattru fundamentali tal-Port il-Kbir se jibqa’ mħares, l-għan huwa li l-pubbliku jingħata aċċess akbar għal dawn ix-xtut permezz ta’ spazji kulturali, rikreattivi u ta’ servizzi. Dr Abela rrefera għal dan il-proġett bħala parti ċentrali mill-viżjoni usa’ ta’ żvilupp għall-pajjiż, fejn l-ekonomija nazzjonali tinbidel minn waħda bbażata fuq l-industrija tqila għal waħda li tipprijoritizza l-kwalità tal-ħajja u l-investiment sostenibbli.

L-ewwel fażi ta’ dan il-pjan se tiffoka b’mod speċifiku fuq il- waterfront tal-Marsa u s-sit fejn qabel kienet topera l-power station tal-Marsa. Dan is-sit, li ntgħażel bħala l-punt tat-tluq għal din it-trasformazzjoni, mistenni jinbidel f’żona moderna mfassla mid-ditta internazzjonali Chapman Taylor. Il-Gvern spjega li malli tagħlaq il-konsultazzjoni pubblika ta’ sitt ġimgħat, se jinfetaħ proċess ta’ konsultazzjoni mas-settur privat biex jiġi analizzat l-interess tas-suq fl-iżvilupp ta’ din l-ewwel fażi.

Din ir-riġenerazzjoni hija marbuta mal-viżjoni Malta 2050, fejn l-enfasi qed tinbidel minn espansjoni għal investiment ta’ kwalità u effiċjenza. Il-Prim Ministru semma kif dan il-proġett ikompli fuq inizjattivi oħra li diġà saru fil-Port il-Kbir, bħas-sistema tax-shore-to-ship li naqqset l-emissjonijiet u s-suċċess fit-trasport marittimu bejn il-Belt u l-Kottonera. Huwa saħaq li lokalitajiet bħall-Marsa se jkunu qed igawdu direttament minn dan it-titjib ambjentali u ekonomiku.

Min-naħa tagħha, il-Ministru għall-Ambjent Miriam Dalli saħqet fuq l-importanza li jinżamm bilanċ bejn ir-rispett lejn l-istorja rikka tal-port u l-ħtieġa ta’ investiment li jħares lejn il-futur. Hija stqarret li l-pjanijiet iridu joffru ħafna aktar minn dak li jeżisti llum u li l-proċess ta’ konsultazzjoni se jkun wieħed inklużiv biex jindirizza kull tħassib li jista’ jinqala’ waqt li jiġi sfruttat il-potenzjal sħiħ taż-żona. Il-pubbliku issa għandu sitt ġimgħat biex jagħti l-fehmiet tiegħu qabel ma l-gvern jipproċedi għall-passi li jmiss mal-privat.