Il-Partit Nazzjonalista qal li l-problemi fis-settur tal-elettriku ma jistgħux jibqgħu jiġu attribwiti biss għad-distribuzzjoni, u sostna li l-qtugħ mifrux tal-Ħamis filgħodu jindika problemi wkoll fil-ġenerazzjoni tal-enerġija.
Fi stqarrija maħruġa wara l-interruzzjoni li ħalliet partijiet kbar minn Malta u Għawdex mingħajr provvista ftit wara t-8am, il-PN qal li l-pubbliku għandu jingħata spjegazzjoni ċara dwar dak li qed jiġri fis-settur.
Enemalta qalet li sistema awtomatika ta’ protezzjoni kienet ġiet attivata biex tissalvagwardja n-network nazzjonali wara telf f’daqqa ta’ provvista.
Skont il-kumpanija, din is-sistema tnaqqas awtomatikament id-domanda għall-elettriku meta jkun meħtieġ, bil-għan li tevita interruzzjoni akbar u tħares in-network minn ħsara aktar serja.
Madankollu, Enemalta ma tatx dettalji dwar x’wassal għat-telf inizjali ta’ provvista li attiva s-sistema.
Il-PN qal li din in-nuqqas ta’ informazzjoni qed tħalli lill-pubbliku f’inċertezza dwar kemm is-sistema tal-enerġija hija affidabbli.
Il-partit argumenta wkoll li, hekk kif il-qtugħ qed ikompli anke f’Ottubru, il-Gvern ma jistax jibqa’ jorbot il-problemi biss ma’ temperaturi għoljin, tibdil fil-klima jew cables li jisħnu żżejjed.
Skont il-PN, hemm bżonn viżjoni fit-tul għas-settur tal-enerġija u investiment li jmur lil hinn minn dak li ddeskriva bħala “management by crisis”.
Il-kritika tal-Oppożizzjoni waslet fl-isfond ta’ sensiela ta’ interruzzjonijiet fil-provvista fl-aħħar ġimgħat.
Enemalta, min-naħa tagħha, qalet li l-provvista bdiet terġa’ tidħol gradwalment f’diversi nħawi, filwaqt li daħħlet fis-servizz generators ta’ riserva biex iżżid il-kapaċità disponibbli.
It-timijiet tekniċi baqgħu jissorveljaw in-network u jaħdmu fuq iż-żoni li kienu għadhom affettwati.
Il-kumpanija kellha wkoll diversi interruzzjonijiet ippjanati għal xogħlijiet ta’ manutenzjoni f’numru ta’ lokalitajiet dakinhar, iżda dawn kienu separati mill-qtugħ mifrux irrappurtat filgħodu