Raġel ta' 37 sena li jgħix il-Fgura ġie arrestat il-Ġimgħa filgħaxija b'rabta ma' traffikar u importazzjoni ta' madwar seba' kilos ta' sustanza suspettata kokaina u madwar 100 gramma kannabis.
Ir-raġel huwa Malti u twaqqaf hekk kif kien ġej lura f'Malta bil-katamaran minn Sqallija. Huwa. ġie ordnat isuq il-vann tiegħu tal-għamla Ford Transit lejn il-garaxx tal-Pulizija, u wara tfittxija estensiva nstabu d-droga moħbijin ġewwa l-axle tar-roti ta' wara tal-vann.
Is-sustanzi għandhom valur ta' madwar €400,000. Ir-raġel bħalissa qiegħed jinżamm fil-lock-up tal-Pulizija fil-Kwartieri Ġenerali, u mistenni jitressaq il-Qorti fil-jiem li ġejjin.
Il-Maġistrat tal-Għassa Dr Victor Axiak ġie infurmat bis-sejba u ħatar inkjesta, filwaqt li l-operazzjonijiet tal-Pulizija għadhom għaddejjin.
Membri mid-Dipartiment tad-Dwana assistew lill-Pulizija waqt din l-operazzjoni.