Mgħammad u armat b’sikkina, daħal fil-ħanut u talab il-flus... Hold up f'ħanut f'Ħal Luqa dan il-lejl

Ilbieraħ, għall-ħabta tal-10:00 p.m il-Pulizija ġiet infurmata li kienet seħħet serqa minn ħanut fi Triq Wesgħet il-Vittmi tal-Gwerra, Ħal Luqa.

Il-Pulizija marret fuq il-post fejn minn stħarriġ preliminari rriżulta li raġel mgħammad u armat b’sikkina, daħal fil-ħanut u talab il-flus lill-kaxxiera, raġel ta’ 38 sena residenti Bormla u tfajla ta’ 16-il sena residenti l-Fgura.

Huwa ħarab minn fuq il-post wara li seraq ammont ta’ flus kontanti.

Fl-inċident ħadd ma weġġa’, bil-Pulizija għaddejja bit-tfittxija għall-ħalliel.

Il-Maġistrat tal-Għassa Dr Rachel Montebello ġiet infurmata bil-każ u ħatret inkjesta filwaqt li l-investigazzjonijiet għadhom għaddejjin.