Raġel arrestat wara li jinstab fil-pussess ta' 100 gramma kokaina f'Tal Pietà

Investigazzjonijiet mill-Pulizija tal-Iskwadra ta’ Kontra d-Droga wasslu sabiex ilbieraħ raġel ta’ 22 sena, residenti l-Furjana ġie arrestat b’rabta ma’ traffikar tad-droga kokaina.

Huwa ġie mwaqqaf ġewwa l-Pietà u nstab fil-pusses ta’ madwar 100 gramma sustanza suspettata kokaina, maqsuma f’diversi qratas.

Wara li ġie arrestat, saret tfittxija fir-residenza tiegħu fejn flimkien ma’ ammont ta’ flus kontanti nstabet aktar sustanza suspettata kokaina. Il-Maġistrat tal-Għassa Gabriella Vella ġiet infurmata bis-sejba u ħatret inkjesta.

Ir-raġel qiegħed jinżamm fil-lock-up tal-Pulizija fil-Kwartieri Ġenerali, il-Furjana u mistenni jitressaq il-Qorti fil-jiem li ġejjin. L-investigazzjonijiet tal-Pulizija tad-Distrett għadhom għaddejjin.