Fl-aħħar 24 siegħa Malta rreġistrat 93 każ ġdid ta' Covid-19 - mill-ġdid numru pjuttost għoli ta' każijiet li huwa wkoll riflessjoni tan-numri li kellha Malta fl-aħħar jiem. Fil-fatt kalkolu sempliċi juri kif Malta kellha medja ta' 86 każ kuljum ta' Covid-19 fl-aħħar ħamest ijiem: 68 nhar il-Erbgħa, 75 nhar il-Ġimgħa, 100 nhar is-Sibt, 95 nhar il-Ħadd, 68 ilbieraħ u 93 illum.
Dawn il-każi rriżultaw minn 2,257 swab li saru u jfisser illi l-każi attivi f'pajjiżna issa tela' għal rekord ta' 881. Dan filwaqt illi n-numru ta' persuni li mietu u kellhom il-Covid-19 telgħet għal 44 persuna dalgħodu bil-mewt ta' anzjan ta' 71 sena.
Fl-istess waqt f'dawn l-24 siegħa fiequ 31 persuna mill-istess virus.
B'kollox minn meta faqqgħet il-pandemija f'Malta kien hawn b'kollox 3,937 każ li minnhom 3,012 - jiġifieri 76.5% - kienu ta' nies li fiequ.
Minn dawn it-93 25 huma ta' persuni li ħadu dan il-virus minn membri tal-familja filwaqt li l-maġġoranza huma każi sporadiċi.