Raġel ta' 57 sena qed isofri minn ġrieħi gravi wara li waqa' minn għoli ġewwa sit ta' kostruzzjoni.
L-inċident seħħ għall-ħabta tas-14:00hrs meta l-Pulizija ġew infurmati li raġel waqa’ minn għoli ġewwa sit ta’ kostruzzjoni li tinsab fi Triq is-Silla kantuniera ma’ Triq iċ-Ċervjola, Marsaskala.
Minn investigazzjonijiet preliminari li għamlet il-Pulizija tad-Distrett, irriżulta li r-raġel, ta’ 57 sena residenti Ħal Qormi, kien qed jagħmel xi xogħol fl-istess sit meta għal xi raġuni waqa’ għoli ta’ madwar sular.
Il-vittma kien assistit minn membri tal-Protezzjoni Ċivili u Tim mediku fuq il-post u ttieħed l-Isptar Mater Dei permezz ta’ ambulanza fejn ġie ċċertifikat li qiegħed isofri minn ġrieħi ta’ natura gravi.
L-investigazzjoni tal-Pulizija għadha għaddejja.