Il-mexxej Kuban Miguel Diaz-Canel ikkonferma nhar il-Ġimgħa li uffiċjali Kubani dan l-aħħar kellhom taħdidiet riċenti mal-gvern tal-Istati Uniti.
Dawn it-taħdidiet qegħdin isiru bil-għan li jindirizzaw id-differenzi li ilhom jeżistu bejn iż-żewġ pajjiżi, għalkemm wissa li kwalunkwe ftehim potenzjali għadu fl-istadji bikrija.
"Dan l-aħħar, uffiċjali Kubani kellhom taħdidiet ma' uffiċjali mill-gvern tal-Istati Uniti sabiex ifittxu soluzzjonijiet għad-differenzi bilaterali li jeżistu," qal Diaz-Canel waqt konferenza stampa nhar il-Ġimgħa filgħodu.
Huwa nnota li kuntatti bħal dawn mhumiex bla preċedent u rrefera għal diskussjonijiet simili matul l-amministrazzjoni tal-eks President Barack Obama.
"Din mhix l-ewwel darba li kellna konversazzjonijiet bħal dawn. Matul l-era Obama kellna taħditiet simili, u issa qegħdin nerġgħu nagħmluhom," qal Diaz-Canel.
Diaz-Canel jiddeskrivi t-taħditiet bħala bikrija u diskreti
Diaz-Canel qal illi n-negozjati bejn il-gvernijiet ħafna drabi jsiru bil-kwiet u jeħtieġu żmien biex jiżviluppaw.
"Dawn huma proċessi li jitwettqu b'diskrezzjoni kbira. Huma proċessi twal, u jrid ikun hemm rieda u kanali għad-djalogu, u dan kollu jieħu ż-żmien," qal.
Huwa żied jgħid li ż-żewġ pajjiżi għadhom 'il bogħod milli jilħqu xi tip ta' ftehim formali.
"Għadna 'l bogħod minn ftehim għax qegħdin fil-fażijiet inizjali ta' ftehim," qal Diaz-Canel.
Skont il-mexxej Kuban, l-iskop tad-diskussjonijiet huwa li jiġi determinat liema kwistjonijiet bilaterali jeħtieġu soluzzjonijiet, jiġu identifikati modi possibbli sabiex jiġu solvuti, u jiġi vvalutat jekk iż-żewġ gvernijiet humiex lesti li jieħdu passi li jistgħu jibbenefikaw lin-nies fiż-żewġ pajjiżi.
Kriżi tal-enerġija li qed taffettwa l-ħajja ta' kuljum f'Kuba
Diaz-Canel irrikonoxxa wkoll li Kuba qiegħda tiffaċċja nuqqas sever ta' fjuwil li qiegħed jaffettwa l-ħajja ta' kuljum madwar il-gżira.
"Għal tliet xhur, l-ebda vapur tal-fjuwil ma wasal. Qegħdin naħdmu taħt kundizzjonijiet ħżiena ħafna li qed ikollhom impatt fuq il-ħajjiet tan-nies kollha tagħna," qal.
Il-President Donald Trump impona imblokk fuq iż-żejt li qed jintbagħat lejn Kuba fl-aħħar ta' Jannar u ħareġ ordni eżekuttiva sabiex jimponi tariffi fuq pajjiżi li biegħu ż-żejt lil Kuba.
L-amministrazzjoni ta' Trump ħadet dan il-pass ftit ġimgħat biss wara l-intervent militari tal-Istati Uniti ġewwa Veneżwela li rriżulta fil-ħtif tal-President Nicolas Maduro u li qatgħet l-aċċess li Kuba kellha għar-riżervi taż-żejt Veneżwelani.
Diaz-Canel qal illi l-gvern se jkompli jżomm lill-pubbliku infurmat dwar l-iżviluppi relatati mat-taħditiet u l-isfidi kontinwi tal-pajjiż.
"Qed ninfurmaw lin-nies f'ħin reali dwar x'qed jiġri f'dan il-proċess," qal Diaz-Canel.
Madankollu, bdew jaslu xi donazzjonijiet u għajnuna umanitarja f'Kuba, żied jgħid Diaz-Canel. Fit-tħabbira tiegħu, huwa rringrazzja lill-President Messikan Claudia Sheinbaum li ddefendiet lil Kuba bis-sħiħ matul dawn l-aħħar xhur.
Iżda hekk kif il-provvisti tal-fjuwil u ż-żejt qed jonqsu madwar Kuba, ġie rrapportat illi n-Nazzjonijiet Uniti kienet f'taħditiet mal-Istati Uniti sabiex jittaffa l-imblokk u jippermettu li ż-żejt jidħol sabiex jintuża speċifikament għal skopijiet umanitarji.
Minbarra n-nuqqas ta' fjuwil, in-nazzjon gżira ilu jesperjenza qtugħ tad-dawl mifrux u kontinwu li kompla jixħet iżjed piżijiet fuq il-Kubani.
Fis-snin sittin, l-Istati Uniti mponiet imblokk b'reazzjoni għat-trasformazzjoni ta' Kuba fi stat soċjalista mmexxi minn Fidel Castro, b'riżultat tas-suċċess tar-Rivoluzzjoni Kubana li fl-1959 irnexxielha tegħleb lir-reġim faxxista pro-Amerikan ta' Fulgencio Batista.
It-tħabbira tasal wara li Kuba qalet li se teħles 51 priġunier
It-tħabbira televiżiva ta' Diaz-Canel saret wara li ntqal li l-gvern Kuban se jeħles 51 priġunier 'il barra mill-gżira.
Il-mexxejja Kubani qalu li l-mossa hija att ta' rieda tajba, li ġejja mir-relazzjoni mill-qrib li għandu l-pajjiż mas-Santa Sede.
Is-Santa Sede għenet sabiex jiġu nnegozjati ftehimiet dwar il-ħelsien tal-priġunieri fil-passat.
It-tħabbira dwar il-ħelsien tal-priġunieri tasal hekk kif il-pajjiż għadu fi kriżi umanitarja u ekonomika b'konsegwenza tal-miżuri aggressivi tal-amministrazzjoni ta' Trump fil-konfront ta' Kuba.
Dawn il-miżuri qegħdin jirriflettu t-theddid riċenti min-naħa tal-Istati Uniti fil-konfront ta' Kuba, hekk kif il-President Trump wissa li Kuba tista' tkun suġġetta għall-intervent militari, simili għal dak tal-Veneżwela, illi jwassal għal bidla fit-tmexxija
Ix-xahar li għadda, Diaz-Canel qal li kien lest li jkellem lill-President Donald Trump dwar il-futur ta' Kuba.
