Konvoj Russu twil 40 mil ikompli miexi lejn Kjiv; Attakk qalil fiċ-ċentru ta' Kharkiv matul il-lejl

Il-kunflitt fl-Ukrajna daħal fis-sitt jum tiegħu bil-ġlied u anke l-imwiet ikompli jiżdied u jintensifika. Il-lejl li għadda kien wieħed diffiċli ħafna.

Fil-fatt, iċ-ċentru tat-tieni l-akbar Belt Ukrena, Kharkiv, kienet fil-mira ta’ attakk bil-missili, li matulu ġie milqut bini prinċipali tal-Gvern li jinsab fil-pjazza ewlenija.

Ir-ritratti u l-filmati jitkellmu waħedhom. Iċ-ċentru ta’ din il-belt huma mimli bini mkisser, ħġieġ u karozzi maħruqa. Għadu mhux magħruf jekk waqt dan l-attakk mitux xi persuni. 

Barbaric Russian missile strikes on the central Freedom Square and residential districts of Kharkiv. Putin is unable to break Ukraine down. He commits more war crimes out of fury, murders innocent civilians. The world can and must do more. INCREASE PRESSURE, ISOLATE RUSSIA FULLY! pic.twitter.com/tN4VHF1A9n

— Dmytro Kuleba (@DmytroKuleba) March 1, 2022

Il-Ministru għall-Affarijiet Barranin Ukran, ippubblika filmat tal-isplużjoni f'din il-pjazza u akkuża lill-President Russu, Vladimir Putin, b'reat ta' Gwerra. 

Intant, ir-Russi qed ikompli javvanzaw lejn il-Belt kapitali Kjiv. Ritratti mis-satteliti qed juru konvoj li huwa twil 40 kilometru mimli vetturi u armamenti tal-forzi Russi. 

Ilbieraħ saret l-ewwel laqgħa bejn delegazzjonijiet miż-żewġ pajjiżi. Aktar laqgħat mistennija hekk kif iż-żewġ delegazzjonijiet irritornaw fil-kapitali tagħhom biex jikkonsultaw dwar dak li ntalab u ntqal waqt l-ewwel laqgħa.