Varata t-tieni edizzjoni tat-Tipsport Malta Cup

Waqt konferenza stampa li saret fil-jiem li għaddew fit-Trophies Lounge f’Ta’ Qali, ingħataw dettalji dwar it-tieni edizzjoni tat-Tipsport Malta Cup li se tkun qed tintlagħab fl-Istadium Nazzjonali bejn il-25 u s-27 ta’ Jannar tas-sena l-ġdida.

Tliet klabbs mir-Repubblika Ċeka jiġifieri FC Banik Ostrava, FK Mlada Boleslav u  FC Zbrojovka Brno kif ukoll it-tim Slovakk ta’ FC DAC Dunajska Streda se jippruvaw jirbħu din il-kompetizzjoni filwaqt li jibbenifikaw minn training camp f’dawn iż-żminijiet.  

Dan it-tournament għandu s-sapport tal-Awtorità Maltija tat-Turiżmu u hu sponsorjat minn Tipsport bil-kordinazzjoni ta’ MFA SportsPlus Limited.

F’din il-konferenza stampa tkellmu s-CEO ta’ Visit Malta Carlo Micallef, il-Kap tal-Aġenzija Kulturali għall-Belt Valletta Jason Micallef u ċ-chairman ta’ MFA SportsPlus Limited Helmut Anhof.

Carlo Micallef beda biex qal li dawn it-training camps huma ta’ importanza kbira għal pajjiżna u fuq kollox ċans anke għall-klabbs Maltin li jilagħbu logħbiet ta’ ħbiberija kontra oppożizzjoni barranija. Fl-istess waqt mil-lat loġistiku u turistiku, pajjiżna qed jibbenefika ħafna minn dawn iż-żjarat li għandhom aspett kummerċjali kbir.

Hawnhekk semma l-arranġamenti li jsiru sabiex ikun hemm organizzazzjoni perfetta li tinvolvi ħafna nies.

Micallef sostna li f’dan is-settur hemm ħafna fejn nimirħu u Malta għandha potenzjal kbir immens. Bħalma wieħed jaf ftit tas-snin oħra, Malta se tkun qed torganizza l-logħob tal-pajjiżi ż-żgħar tal-Ewropa u għalhekk wieħed jista’ jkompli jipperfezzjona l-organizazzjoni sa dak iż-żmien.

Micallef qal kif din il-kollaborazzjoni kummerċjali hi importanti wkoll għall-MFA li qed tieħu dan is-settur b’serjetà kbira. Fl-istess waqt jaf li għas-snin li ġejjin, dawn it-training camps se jkunu dejjem aktar popolari.

Micallef temm jgħid li diversi kumpaniji bi pjaċir qed jagħtu l-għajnuna tagħhom meta joħorġu b’dawn it-tip ta’ ideat, xhieda tal-fiduċja li qed iħaddnu anke bħala VisitMalta.

Jason Micallef beda biex qal li Malta qed tikber ħafna fil-qasam tas-settur turistiku u dan kollu mhux ristrett għas-sajf biss minħabba li pajjiżna sar destinazzjoni għas-sena kollha. Hu qal li hemm diversi fatturi li juru dan fejn eżempju ċar hu t-temp tagħna li jippermetti dawn it-tip ta’ attivitajiet.

Micallef qal li dan kollu jiġġenera ħafna iktar xogħol fil-lukandi tagħna filwaqt li joħloq niċeċ ideali għal iktar introjtu finanzjarju.

Iċ-chairman tal-Aġenzija Kulturali tal-belt kapitali Valletta qal li meta sentejn ilu ġew PSV Eindhoven f’Malta, huma laqtu l-għajn meta f’waħda mis-sessjonijiet ta’ taħriġ saret fil-bajja t’Għajn Tuffieħa. Meta din ġiet iffilmjati u mxerrda fl-internet, kien hemm ħafna nies barranin li rawha u dik kienet pubbliċità tajba ħafna għal pajjiżna. Fuq kollox meta l-plejers jiġu Malta, huma jġibu wkoll lill-familja tagħhom, partitarji u xi nies oħra u dan kollu hu ta’ vantaġġ.

Micallef stqarr li hawn kompetizzjoni kbira f’dan is-settur minħabba li anke Spanja, il-Portugall u pajjiżi Mediterranji jirreklamaw il-klima u l-faċilitajiet ta’ pajjiżhom. F’dan ir-rigward, Micallef xtaq jirringrazzja lill-MFA li dejjem sabet għajnuna kbira mingħandha.

Finalment hu fiduċjuż li fis-snin li ġejjin dawn it-tip ta’ żjarat minn timijiet barranin se jkomplu jiżdiedu dejjem aktar.

Iċ-chairman ta’ MFA SportsPlus Limited Helmut Anhof qal li hu ta’ sodisfazzjon kbir għalih li dawn it-tip ta’ attivitajiet sejrin dejjem għall-aħjar. Huma qed jippruvaw iwessgħu aktar opportunitajiet u b’hekk igawdi kulħadd.

Anhof semma l-faċilitajiet mill-isbaħ li għandna f’pajjiżna u li qed ikunu paragunati tajjeb mad-diversi pajjiżi li spiċċaw kompetituri magħna. Hu semma kif l-assoċjazzjoni sportiva tal-futbol tkun verament fuq quddiem sabiex tippromwovi żjarat bħal dawn u li flimkien mal-partijiet involuti qed tassigura riżultati pożittivi.

Anhof xtaq jirringrazzja lil kull min hu nvolut sabiex timijiet barranin jiġu jżuru pajjiżna u jibqgħu jiftakru ż-żjara li jkunu għamlu.