Politika ristretta u mċajpra

Meta ġie elett prim ministru u mexxej tal-Partit Laburista Robert Abela f’Jannar tal-2020, kien hemm mewġa ta’ deċiżjonijiet politiċi mnebbħa minn serjetà politika. Ma kinux deċiżjonijiet kbar imma kienu jindikaw distakk mill-politika ta’ Joseph Muscat. Fost in-nies li ġew imwarrba, jew ejja ngħidu mhux imfittxija, kien hemm nies bħal Neville Gafà u Chris Cardona, biex ma nsemmux lil Joseph Muscat stess, kif ukoll lil Keith Schembri. 

Taqbel jew ma taqbilx mad-deċiżjoni ta’ Abela, kienu deċiżjonijiet kuraġġużi li kienu xprunati minn xewqa biex jintbagħat messaġġ lil kulħadd li din kienet amministrazzjoni differenti li riedet tmexxi politika bi standards għoljin. 

Dak il-messaġġ wasal. Infatti mhux wasal biss imma kien apprezzat minn ħafna nies. 

Fast forward u Robert Abela mhux biss mar kontra kull deċiżjoni, imma spiċċa qisu jrid inessi x’kien għamel. 

Infatti trid tara biss dak li ġara fl-inkjesta tal-Vitals, fejn rajna attentat ċar biex jiġi mħarrek kulħadd mingħajr ebda forma ta’ interrogazzjoni uffiċjali biex Joseph Muscat ma jiġix jew ma jispiċċax fiċ-ċentru tal-attenzjoni tal-midja. 

Biċċa ħniżrija bħalha qatt ma rajna. 

Mhux hekk biss, rajna wkoll attentati ċari biex nies li kienu esklużi mill-Partit Laburista jiġu mistiedna lura. 

U dan kien ċar f’dan l-aħħar ġranet meta rajna lil Neville Gafà lura kastilja u Chris Cardona bħala konsulent mal-Ministru tal-edukazzjoni. U bħalma nafu, dawn id-deċiżjonijiet ma setgħux saru jekk mhux bil-barka ta’ Robert Abela stess. 

Dan jikkonferma żewġ affarijiet; waħda li Abela jemmen li dawn l-għażliet se jrebbħuh apprezzament politiku, u t-tieni se jwaqqfu ċerti nies milli jikkritikawh li ma jaħsibx biżżejjed għal-Laburisti. 

Abela ma jistax ikun aktar żbaljat. 

Dawn id-deċiżjonijiet politiċi se jkomplu jirrabjaw lil dawk il-votanti li potenzjalment huma votanti Laburisti imma li jinsabu diżgustati bl-għemil tal-Gvern Laburista u l-mexxejja tiegħu. 

Il-politiċi għandhom ħabta li l-ottika tagħhom tkun ristretta u mċajpra … dan każ eżemplari.