Hawn xi ħadd li jrid jitfa’ l-ewwel ġebla?

Ġimgħa ilu din il-gazzetta ppubblikat artiklu fuq Alex Borg. Fl-artiklu kien hemm referenza fl-aħħar tal-artiklu għall-fatt li Alex Borg u l-mara tiegħu huma koppja perfetta.  

Ktibna dan b’sens pożittiv mhux negattiv u użajna – il-kliem ‘ġmiel ta’ raġel’ u fil-każ tal-mara tiegħu bħala persuna ‘sabiħa’.   

Stajna għażilna kliem ieħor biex niddeskrivu l-koppja Borg bħala koppja perfetta fil-politika, kif jgħid l-Ingliż – that ticks all the boxes.  

Kien hemm reazzjoni, fosthom mill-awtur u poeta Immanuel Mifsud (li kien jikteb fil-gazzetta ILLUM) li għajjar lil din il-gazzetta bħala dilettanteska, u bħal Cyrus Engerer (li jibqa’ dik il-persuna magħrufa li kixef ritratti intimi tal-eks partner tiegħu – każ klassiku ta’ revenge porn) bħala gazzetta sessista. 

Li nafu li post Borg mhux fil-politika, wisq aktar viċin il-kariga tal-kap tal-PN.

Naċċettaw il-kritika, imma ma jfissirx li mhux se ngħaddu deskrizzjonijiet ta’ persuni fil-futur għax hemm biża’ li xi ħadd jaqlgħalna t-tamal.  

Ħadd mid-dehra m’għandu s-sinsla pereżempju li jiġġudika d-dagħa u l-kliem ħażin tal-podcaster Jon Mallia. Jew inkella bħalma ġara għal għexieren ta’ snin l-attakk feroċi fuq in-nisa u jew l-orjentazzjoni sesswali mingħand il-bloger Caruana Galizia. U xi ngħidu għax-xmara ta’ kummenti sesswali u vulgari fuq Michelle Muscat, il-mara ta’ Joseph Muscat, fosthom anke mill-kantant brillanti tal-grupp Brikkuni Mario Vella? 

U għal żmien twil ħadd ma qal xejn dwar l-esaġerazzjonijiet tad-duo Bajd u Bejken, bil-kliem doppju sens, orġa ta’ kliem verament baxx u oxxen. Issa għax missejna t-tema marbuta mal-ġeneru, qamu l-irwiefen kollha. Imma alla jbierek sakemm tkellmu kif tkellmu ħadd ma qal xejn.   

U l-istess nistgħu ngħidu fuq il-karattri l-oħra li jħobbu jippritkaw u jippontifikaw. 

Il-midja soċjali hija kerha u bla limiti, tlifna l-kontroll, u ma nafux kif f’dan l-istadju wieħed jista’ jikkontrolla jew inkella jillimita l-esaġerazzjonijiet. Forsi l-aħjar għażla hija li tevita li jkollok aċċess għall-midja soċjali. Hija għażla tagħna li naraw jekk narawx Bajd u Bejken, jew nisimgħux il-prietki ta’ Jon Mallia, jew jekk naqrawx id-dikjarazzjonijiet ta’ Cyrus Engerer, l’hekk imsejjaħ suldat tal-azzar tal-Prim Ministru Joseph Muscat. 

Huwa minnu li l-forte ta’ dil-gazzetta hija l-analiżi politika u soċjali. L-aħħar ħaġa li rridu nagħmlu hi li nissuġġerixxu li jkun hemm kontroll ta’ x’ngħidu jew ma ngħidux. Kummenti li jinċitaw il-vjolenza jew il-mibegħda m’għandhomx ikunu tollerati. Imma lanqas aħna ċerti jekk pereżempju l-kumment nofsu ċajtier tal-Avukat anzjan Andrew Borg Cardona li t-trolls Laburisti għandhom jiġu offruti ewtansja jaqa’ taħt il-kategorija ta’ affarijiet li m'għandhom qatt jinkitbu. Bl-istess mod kif is-satirista Matthew Bonanno kien qal b’mod ċajtier li missna nwaddbu l-bombi fuq il-knisja River of Love. 

Ir-risposta jew soluzzjoni mhix waħda faċli.  

Bħalma semmejna ħa noqogħdu ftit barra mill-kontroversja. Nafu fejn qegħdin ma’ ċerti nies bħal Immanuel Mifsud il-poeta, u ma’ Cyrus Engerer il-pinnur politiku.   

Nafu wkoll li fil-każ tad-Deputat Għawdxi Nazzjonalista Alex Borg, nafu li bir-reazzjoni għall-kritika mill-kardjologu Kevin Cassar u r-reazzjoni għall-użu ta’ kliem fl-artiklu dwaru fil-gazzetta ILLUM, ngħidu bla tlaqliq li naħsbu li postu mhux fil-politika. Fil-politika jrid ikollok ġilda ħoxna. Apparti n-nuqqas kbir ta’ stoffa politika, kif ukoll assenza ta’ xi politika viżjonarja u mhux populista. 

U jekk postu mhux fil-politika, ċertament postu mhu xejn viċin il-kariga tal-kap tal-Partit Nazzjonalista. Fuq dik ċerti!