Inner Garden — vjaġġ liriku ta’ kreattività, preżenza, u żvilupp emozzjonali

Dan is-sajf, l-artista Julia Borg qed terġa’ lura lejn The Phoenicia Malta u tistedinna fid-dinja intima u luminuża tagħha bl-aħħar wirja tagħha, Inner Garden. Din hija kollezzjoni vibranti u ffjurita li tnisslet minn sena ta’ ftuħ emozzjonali, tkabbir artistiku, u preżenza mill-ġdid. 

Filwaqt li timmarka punt ta’ bidla fil-prattika kreattiva tagħha, Inner Garden tiżvolġi bħala djalogu viżiv u emozzjonali bejn l-artist u l-ambjent tagħha. “Matul din l-aħħar sena,” tispjega Borg, “sibt lili nnifsi ninfetaħ aktar — nilqa’ nies f’ħajti, u niġi milqugħa jien ukoll. Dawn l-iskambji saru d-dawl li ħalla l-ħajja f’din il-kollezzjoni.” 

Kull xogħol jirrifletti din ir-reżonanza maqsuma; ħaj permezz ta’ jdejn espressiva u kuraġġuża. Miżbugħa waqt li kienet immersa fir-ritmi tal-jazz, il-proċess ta’ Borg kien wieħed spontanju u emozzjonali, bil-kuluri spiss imħallta direttament fuq il-kanvas biex jinħolqu awtentiċità u sorpriża. Il-paletta tagħha, bi ħdura ħajja u maġenta radjanti, tindika l-vitalità ta’ pajsaġġi interjuri fi fjur sħiħ. 

Il-messaġġ fiċ-ċentru tal-wirja huwa kemm universali, kif ukoll personali: Ħu ħsieb il-ġnien ta’ ġewwa tiegħek. Kun preżenti. Oħloq b’intenzjoni. Borg tfakkarna li ġewwa kull wieħed u waħda minna hemm spazju kreattiv u sagru: post li jixraqlu kura, attenzjoni, u ferħ. Ix-xogħlijiet tagħha jsiru meditazzjonijiet fuq dak l-ispazju, u jistiednu lill-viżitaturi biex jieqfu, jirriflettu, u jerġgħu jgħaqqdu ruħhom mal-ġewwieni tagħhom. 

B’żieda emozzjonanti mal-wirja, Borg se tilbes libsa li ħietet hi stess — l-ewwel waħda tagħha — bħala ġest simboliku ta’ ritorn għat-tfulija u l-kuraġġ tal-bidu kreattiv. “Ma kienx dwar ir-riżultat” tgħid, “iżda dwar il-proċess — l-att li toħloq xi ħaġa sempliċement għax ħassejtni miġbuda lejha.” 

Ix-xogħlijiet huma magħmula b’teknika mħallta, li tgħaqqad l-akriliku maż-żejt biex jinħoloq fond, fluwidità, u tessut espressiv. Is-saffi differenti tal-materjali jirriflettu s-saffi emozzjonali tas-sena li ispirathom. 

Fl-aħħar mill-aħħar, Inner Garden hija offerta ta’ ruħ, sejħa biex niftakru fil-ferħ tal-ħolqien, u ċelebrazzjoni kwieta tas-sbuħija li tiġi meta tkun ħaj b’mod sħiħ u radjanti. 

Inner Garden hija miftuħa fil-Palm Court Lounge, The Phoenicia Malta, sal-31 ta’ Lulju.