Festivals Malta iħabbru l-iskeda tal-avvenimenti għall-Valletta Baroque Festival 2024

Il-Valletta Baroque Festival ġie mtellgħa għall-ewwel darba fl-2013, li tfisser li l-edizzjoni li ġejja hija t-12-il waħda. Minn dak iż-żmien ’l hawn, uħud mill-aqwa artisti u gruppi fil-qasam tal-mużika Barokka għamlu wirjiet fil-Belt kapitali. Il-festival idum għal aktar minn tliet ġimgħat u jsir f’numru ta’ postijiet li jirrappreżentaw il-qofol tal-arkitettura Barokka f’Malta, fosthom il-Kon-Katidral ta’ San Ġwann, il-Palazz Verdala, Palazzo Parisio, u t-Teatru Manoel. 

Il-Valletta Baroque Festival iwiegħed bosta atti eċitanti, inklużi programm divers ta’ ’l fuq minn 30 kunċert li qed isiru f’aktar minn 15-il post madwar il-gżira. Uħud mill-aqwa talenti lokali u internazzjonali jinkludu Robin Pharo, Zefiro Ensemble, Alon Sariel, Holland Baroque ma’ Wu Wei, Lucile Boulanger, Vox Luminis, u Les Contre-Sujets. 

Ir-Rock Troupers u l-Valletta Baroque Ensemble se jirritornaw ukoll għal din l-edizzjoni, bil-proġett tagħhom BaRock fit-Teatru Manoel. Barra minn hekk, il-festival se jinkludi wħud mill-aqwa pjanisti tal-kunċerti f’Malta, li se jinterpretaw ix-xogħlijiet ta’ Bach, b’kollaborazzjoni mal-Orkestra Filarmonika ta’ Malta. 

Il-festival se jinfetaħ b’eżekuzzjoni grandjuża ta’ ‘St John Passion BWV 245’ fil-Kon-Katidral ta’ San Ġwann, immexxija mill-Valletta Baroque Ensemble u Kor Malta taħt is-superviżjoni mużikali ta’ Riccardo Bianchi. Wara tliet ġimgħat ta’ avvenimenti inkredibbli bla waqfien, il-festival se jintemm b’opra għat-tfal, La Serva Padrona ta’ Pergolesi, taħt id-direzzjoni ta’ Jacob Piccinino u s-superviżjoni mużikali ta’ Sarah Spiteri. 

Programm dettaljat tal-avvenimenti u l-kunċerti kollha, flimkien mal-biljetti, jista’ jinstab fuq is-sit uffiċjali ta’ Festivals Malta: https://www.festivals.mt/