L-unjoni tal-kerrejja Solidarjetà se tagħmel konferenza stampa nhar il-Ħadd li ġej, fis-6pm fi Triq il-Garzella, Mellieħa, f’għaqda mal-kerrejja li allegatament ġew imkeċċija b’mod illegali u sfruttati minn sidien li qed jiġu deskritti bħala “kriminali.”
Il-konferenza qed issir ftit jiem wara li l-gazzetta oħt, MaltaToday żvelat stejjer ta’ abbuż, aggressjoni u anke razziżmu li kienu rrakkontati minn diversi kerrejja li krew mingħand il-koppja fil-Mellieħa.
Għalkemm mhux il-kerrejja kollha kienu jgħixu fl-istess proprjetà fl-istess ħin, ix-xhieda tagħhom turi xejra simili: l-ewwel, sid “ħelu u ġentili” meta kienu jiltaqgħu l-ewwel darba; wara ftit ġimgħat, aggressiv u intollerabbli.
Il-kerrejja rrappurtaw li wara li s-sid jiġbor l-ewwel kirja u d-depożitu, jibda jhedded u jippersegwita lill-kerrejja biex jitilqu. Id-depożitu qatt ma jerġa jingħata lura, u l-proċess jerġa’ jibda b’kerrejja ġodda.
“F’dawn l-aħħar xhur, diversi membri tagħna u kerrejja oħra ġew imkeċċija b’mod illegali u tilfu kemm il-kera kif ukoll id-depożitu tagħhom mill-istess proprjetà,” qalet l-union fil-komunikat tagħha nhar il-Ġimgħa.
“L-abbużi mhumiex każijiet iżolati”
Solidarjetà sostniet li dawn l-esperjenzi mhumiex każijiet individwali iżda parti minn mudell ta’ sfruttament li qed jiġi ffaċilitat minn nuqqas ta’ regoli ċari.
“F’Malta ma hemmx sistema ta’ liċenzjar tas-sidien. Dan ifisser li sidien li jwettqu ksur bħal żieda illegali fil-kera, li ma jreġġgħux lura d-depożiti, jew saħansitra jużaw vjolenza, jistgħu jibqgħu jħaddmu l-proprjetà tagħhom u jkomplu jiksbu profitt,” kompliet l-union.
Hija qalet li dan in-nuqqas ta’ regolamentazzjoni qed iħalli lill-kerrejja, speċjalment dawk vulnerabbli jew mhux infurmati dwar id-drittijiet tagħhom, bla ebda protezzjoni. “L-azzjoni mill-awtoritajiet dwartkeċċija illegali hi żona griża li ma tipproteġix lill-kerrejja li jispiċċaw bla dar u bla flus.”
Sejħa għal liċenzjar tas-sidien
L-union qed tagħmel pressjoni fuq il-gvern u l-pulizija biex jieħdu azzjoni immedjata kontra dawn li sejħulhom “sidien kriminali,” sabiex dawn ma jkunux jistgħu jibqgħu jisfruttaw is-suq tal-kiri.
Skont Solidarjetà, il-pass kruċjali hu li jkun hemm sistema ta’ liċenzjar: kull sid għandu jkollu liċenzja biex jikri, u din għandha tiġi revokata jekk jinqabad jagħmel abbużi jew illegalitajiet.
“Huwa biss meta sidien abbużivi u kriminali jiġu mwaqqfa, u jitqiegħed fil-post sistema ta’ liċenzjar, li s-suq tal-kiri f’Malta jista’ jieqaf ikun bla regoli, instabbli u mhux sostenibbli,” temmet tgħid l-union.
Il-konferenza stampa ta’ nhar il-Ħadd qed issir bl-appoġġ ta’ Moviment Graffitti, Aditus u Blue Door Education.
