L-Uffiċċju tal-Presidenza informa li n-nutar Dr Anthony Spiteri Debono, ir-raġel tal-President Myriam Spiteri Debono miet iktar kmieni llum.
Fi stqarrija qasira, l-Uffiċċju esprima s-sogħba tiegħu u f’dan il-mument diffiċli talab li tiġi rispettata l-privatezza tal-familja.
Huwa jħalli warajh ukoll it-tliet ulied tiegħu – Elena, George u Maria Kristina – kif ukoll in-neputijiet tiegħu Alexandra, Paul, Pippa u Beppe.
Il-Gvern Malti sellem il-memorja ta’ Anthony Spiteri Debono u esprima l-kondoljanzi tiegħu lill-President u lill-familja tagħha.
Il-Prim Ministru Robert Abela ddeskrivih bħala “raġel ġentili” u “persuna umli.”
Fi stqarrija separata, l-Ispeaker tal-Kamra tad-Deputati esprima wkoll id-dieqa tiegħu għall-mewt tan-Nutar Spiteri Debono.
Il-Kap tal-Oppożizzjoni Bernard Grech qal li Anthony Spiteri Debono kien persuna awtentika, kemm bħala student fil-kors tal-liġi, bħala kollega, kif ukoll bħala r-raġel tal-President ta’ Malta.
Grech qal li kkuntattja lill-President biex iwassal il-kondoljanzi tiegħu u tal-Partit Nazzjonalista f’dan iż-żmien diffiċli.
Il-President tal-Parlament Ewropew Roberta Metsola qalet li l-poplu Malti u Għawdxi huwa grat għas-servizz li ta Anthony Spiteri Debono matul il-presidenza ta’ martu.
“F’kull konversazzjoni li kelli miegħu, dejjem rajt raġel li kien qed jagħti l-kontribut tiegħu għall-presidenza ta’ Myriam Spiteri Debono. Kien persuna kapaċi jwassal messaġġ bil-kelma, bis-silenzju u saħansitra b’dehra,” qalet Metsola f'kumment fuq Facebook hekk kif offriet il-kondoljanzi tagħha lill-President u lill-familja tagħha.
