Il-Eurovision jibda illejla f’Basel

Il-festa l-kbira tal-mużika Ewropea, il-Eurovision Song Contest, tibda illejla bl-ewwel semi-finali fil-belt spettakolari ta’ Basel, l-Iżvizzera! Bi produzzjoni grandjuża, effetti spettakolari u spettaklu ta’ dawl, mużika u emozzjoni, miljuni ta’ telespettaturi madwar l-Ewropa u lil hinn se jkunu qed isegwu kull mument.

Din is-sena, 37 pajjiż se jkunu qed jipparteċipaw fil-Eurovision, b’żewġ semi-finali li se jsiru fit-13 u l-15 ta’ Mejju, u l-finali nhar is-Sibt 17 ta’ Mejju. Il-“Big Five” – Franza, Ġermanja, Italja, Spanja u r-Renju Unit – flimkien mal-pajjiż ospitanti, l-Iżvizzera, huma diġà kkwalifikati għall-finali.

Għal Malta, it-tama hija kbira b’Miriana Conte, li se tinterpreta Serving, diska ta’ enerġija li kisbet bosta diskussjonijiet fost il-partitarji għal-lirika provokattiva tagħha li kellha tinbidel wara deċiżjoni tal-EBU f’Marzu.

Malta se tieħu sehem fit-tieni semifinali nhar il-Ħamis. Is-siti tal-imħatri jissuġġerixxu li Serving tista’ tkun b’saħħita biżżejjed biex tgħaddi sal-finali tas-Sibt, xi ħaġa li Malta rnexxielha tagħmel biss tliet darbiet fl-aħħar għaxar snin.