Suldat ta’ 32 sena minn Ħaż-Żabbar, ġie mixli b’ċitazzjoni bl-omiċidju involontarju tas-sewwieq ta’ mutur ta’ 28 sena Andrea Alamango.
Alamango kien miet wara ħabta fuq il-Kappara Flyover f’Marzu tal-2022.
Suldat ta’ 32 sena minn Ħaż-Żabbar, ġie mixli b’ċitazzjoni bl-omiċidju involontarju tas-sewwieq ta’ mutur ta’ 28 sena Andrea Alamango. Alamango kien miet wara ħabta fuq il-Kappara Flyover f’Marzu tal-2022.
L-akkużat, Marvin Buhagiar, qed jiġi mixli wkoll li kkaġuna ħsarat involontarji lill-mutur tal-vittma.
L-inċident seħħ fil-15 ta’ Marzu 2022 għall-ħabta tal-11pm, meta żewġ muturi Suzuki GSXR600 ħabtu fi Triq Mikiel Anton Vassalli. Iż-żewġ sewwieqa — Alamango u Buhagiar — ittieħdu Mater Dei permezz ta’ ambulanza, iżda ftit sigħat wara Alamango ċeda għall-ġrieħi tiegħu. Buhagiar weġġa’ ħafif.
Fil-Qorti nhar it-Tlieta, il-Pulizija li waslu minn tal-ewwel fuq il-post taw ix-xhieda tagħhom.
Is-Surġent Sandro Mangion qal li xhud ra l-inċident iseħħ fil-mera tal-mutur tiegħu. Il-persuna li rat kollox spjegat li wieħed mis-sewwieqa daħal fil-karreġġjata ta’ barra u laqat lill-ieħor minn naħa, b’mod li t-tnejn ittajru mill-muturi tagħhom.
L-Ispettur Dylan Pace, dak iż-żmien konstabbli, qal li rċieva l-informazzjoni mill-Control Room għall-ħabta tal-11:30pm. Meta marru fuq il-post, l-uffiċjali sabu demm fuq il-barrieri u grif estensiv fuq il-karreġġjata. Il-muturi nstabu mal-art, u dak tal-vittma kien ġie mbuttat madwar 100 metru ’l bogħod mill-punt tal-ħabta.
Il-Qorti għallbet li hemm biżżejjed provi biex il-proċeduri jkomplu, deċiżjoni li ma ġietx ikkontestata mid-difiża.
Is-seduta li jmiss ġiet skedata għas-7 ta’ Jannar fl-12pm.
Il-każ qed jiġi mmexxi mill-Ispettur Ian Azzopardi u mill-Avukat tal-Avukat Ġenerali Darlene Grima, filwaqt li l-avukati Franco Debono u Francesca Zarb qegħdin jiddefendu lill-akkużat. Il-Maġistrat Monica Vella qed tisma’ l-kawża.
