Il-qorti semgħet kif impjegat Ġermaniż ta’ 28 sena, meħud Malta taħt Mandat ta’ Arrest Ewropew, huwa suspettat li wettaq frodi estensiva fuq Novum Bank, fejn allegatament żbanka €114,000 billi manipula kontijiet u limiti ta’ karti ta’ kreditu ta’ 37 klijent.
Feres Yousri Aumuller tressaq il-Qorti tal-Maġistrati akkużat b’ħasil ta’ flus, qligħ frawdolenti, qerq, approprjazzjoni indebita u abbuż tas-sistemi tal-kompjuter. Huwa wieġeb mhux ħati.
It-testimonjanzi semgħu kif kollox beda meta fit-30 ta’ Novembru 2023 il-bank irċieva żewġ ilmenti minn klijenti li nnutaw transazzjonijiet li ma awtorizzawx fuq il-karti tagħhom.
Dan wassal għal investigazzjoni preliminari li indikata li l-attività suspettuża kienet oriġinata minn ġewwa l-bank.
Feres, li dak il-ħin kien fuq leave, ma rritornax għax-xogħol kif skedat — fatt li kompla jqanqal suspett.
L-investigazzjoni tal-IT skopriet li d-dettalji personali ta’ 37 klijent, inklużi emails u numri tal-mowbajl marbuta mal-karti, kienu nbidlu internament. L-indirizzi tal-email kienu saħansitra ġew sostitwiti b’domains oħra.
Il-bank innota wkoll mudelli ripetuti ta’ rtirar li ħolqu allarm fis-sistema, iżda l-fraud locks kienu nħelsu mill-istess impjegati — allegatament biex it-transazzjonijiet illegalment jibqgħu għaddejjin.
Ħafna mill-karti affettwati kienu inattivi iżda kellhom limiti għoljin, u f’bosta każi il-limiti ġew massimati kompletament.
Il-bank ikkonferma li l-ammont totali misruq jammonta għal €114,000. Minħabba li l-klijenti kienu vittmi diretti, il-bank kellu jikkumpensahom immedjatament u issa beda kawża ċivili biex jipprova jirkupra t-telf.
Talba għall-ħelsien mill-arrest
Id-difiża talbet għall-ħelsien mill-arrest, u ppreżentat żewġ xhieda: sid ta’ proprjetà li kkonferma li daħal f’kirja fit-tul mal-akkużat, u raġel ieħor li ddikjara li lest jgħinu finanzjarjament.
Il-maġistrat Leonard Caruana se jagħti d-deċiżjoni dwar il-bail in camera.
Il-prosekuzzjoni kienet immexxija mis-Supretendent Hubert Cini Ferrante, assistit mill-avukati tal-Avukat Ġenerali Marica Ciantar u Alessia Schembri. L-avukati Joe Giglio u Mattea Giglio dehru għal Novum Bank.
