Il-mara wara l-inċident f’Baħar iċ-Ċagħaq tammetti ħtija fuq erba’ minn ħames akkużi

Il-mara f’inċident f’Baħar iċ-Ċagħaq tammetti ħtija fuq erba’ akkużi iżda tirrifjuta l-ħtija għal sewqan perikoluż.

Ritratt:Illum
Ritratt:Illum

Mara ta’ 44 sena akkużata li kienet sitt darbiet aktar mill-limitu legali tal-alkoħol meta ħabtet ma’ mutur fuq il-Coast Road ammettiet il-ħtija tagħha fuq erba’ minn ħames akkużi li qed taffaċċja.

Yoana Valentinova Gatt, IT manager u omm minn San Pawl il-Baħar, qed taffaċċja akkużi li jinkludu li kkawżat ġrieħi gravi, sewqan perikoluż, sewqan taħt l-influwenza tal-alkoħol u ħsara fil-propjetà wara l-inċident tat-17 ta’ Awwissu qrib Tony’s Ice-Cream f’Baħar iċ-Ċagħaq.

Il-vittma, raġel Belġjan ta’ 53 sena li jgħix il-Gżira, għadu l-isptar f’kundizzjoni stabbli wara li inizjalment ġie ċċertifikat kritiku.

Fil-qorti nhar l-Erbgħa, Gatt ammettiet il-ħtija tagħha fuq erba’ akkużi fosthom sewqan taħt l-influwenza tal-alkoħol u kkawżar ta’ ġrieħi gravi, iżda wieġbet mhux ħatja għas-sewqan perikoluż u irresponsabbli. Il-Maġistrat Antoine Agius Bonnici wissiha li l-akkużi li ammettiet fihom jistgħu jġorru sentenza ta’ priġunerija. Wara konsultazzjoni qasira mal-avukat tagħha, Gatt ikkonfermat l-ammissioni tagħha.

Il-qorti semgħet kif test tal-breathalyser wera li Gatt kellha 124.9 μg/100ml nifs – sitt darbiet aktar mil-limitu legali ta’ 22 μg. Hija kienet arrestata fis-6:04pm wara li ttieħdet għall-interrogazzjoni.

Skont ir-rapport tal-pulizija ppreżentat mill-Ispettur Nathan Bugeja, il-ħabta seħħet fl-3:37pm meta l-mutur kien wieqaf ħdejn roundabout. Esperti kkonfermaw li l-karozza Toyota Aygo tal-akkużata ma kinitx sejra b’veloċità eċċessiva.

Is-surġent Damian Galea, wieħed mill-ewwel uffiċjali fuq il-post, qal li l-akkużata tat diversi verżjonijiet kontradittorji qabel ma ġiet mitluba tagħmel it-test tal-breathalyser. Huwa sostna li l-ħabta kienet mill-bumper ta’ quddiem tal-karozza fuq wara tal-mutur, u ppreżenta wkoll filmat mill-bodycam tiegħu.

Xhud tal-inċident, Matthew Bianco, irrakkonta kif hu u ħames irġiel oħra kellhom jerfgħu l-karozza biex ineħħu lill-vittma li kien spiċċa taħt il-vettura. “Ġismu kien kompletament taħt il-karozza,” qal, waqt li rrimarka li kien għadu jieħu n-nifs. Huwa u martu għenu lill-vittma sakemm waslet l-ambulanza. Martu, Christina, ikkonfermat li rrikonoxxiet lill-akkużata fuq il-post.

Xhud ieħor, Jamie Zammit, li kien qiegħed isuq wara l-karozza tal-akkużata, qal li din ma kinitx qed issuq b’veloċità għolja iżda ra l-mutur jaqa’ u ċempel mill-ewwel lill-pulizija.

Il-proċeduri tal-kompilazzjoni se jkomplu aktar tard illum, bl-imħallef mistennija jiddeċiedi dwar it-talba għall-ħelsien mill-arrest tal-akkużata.

L-Ispettur Nathan Bugeja qed imexxi l-prosekuzzjoni, filwaqt li l-akkużata qed tingħata għajnuna legali mill-avukat Nadya Fyott. Il-kawża qiegħda tinstema’ quddiem il-Maġistrat Antoine Agius Bonnici.

Deċiżjoni dwar il-ħelsien mill-arrest posposta għall-Ġimgħa

 Il-qorti aktar tard ipposponiet id-deċiżjoni tagħha dwar it-talba għall-ħelsien mill-arrest tal-mara għall-Ġimgħa fid-9:00am, u ordnat li tibqa' arrestata sadanittant.

Il-prosekuzzjoni argumentat li r-rekords ta' Identity Malta juru li għandha passaport validu li jiskadi fl-2029, u dan iqajjem biża' li tista' taħrab, għalkemm l-akkużata insistiet li għandha biss karta tal-identità. Rappreżentant minn Identity Malta mistenni jixhed fil-qorti, bil-possibbiltà li s-seduta titmexxa 'l quddiem jekk waħda tkun disponibbli qabel.

L-Ispettur Nathan Bugeja qed imexxi l-prosekuzzjoni, filwaqt li l-avukat tal-għajnuna legali Nadya Fyott qed tassisti lill-akkużata. Il-Maġistrat Antione Agius Bonnici ppresieda l-każ

More in Qrati u Pulizija