Il-Qorti wriet preġudizzju kontra Robert Aquilina, argumenta l-avukat Jason Azzopardi waqt seduta fil-Qorti tal-Appell nhar it-Tlieta.
Is-sottomissjonijiet orali kienu relatati mal-appell imressaq mill-NGO Repubblika wara li l-Qorti tal-Maġistrati rrifjutat it-talba biex il-Kummissarju tal-Pulizija Angelo Gafà jressaq prosekuzzjonijiet kriminali kontra l-uffiċjali ta' Pilatus Bank. Il-kawża saret wara li inkjesta maġisterjali kienet sabet evidenza ta’ reati, fosthom tal-ħasil tal-flus.
L-appell sar wara li l-Qorti rrifjutat li tordna lil Gafà jiġi obbligat jieħu passi legali kontra l-uffiċjali tal-bank, u ddeskriviet l-evidenza ppreżentata minn Repubblika bħala spekulazzjoni u "hearsay".
L-avukat Azzopardi sostna li minkejja li s-sentenza tal-Qorti kienet tinvoka diversi drabi l-kunċett ta’ "hearsay", ma sar l-ebda eżempju konkret biex jiġi sostnut dan l-argument. Huwa żied jgħid li l-Qorti kienet injorat il-konkluzjonijiet tal-inkjesta maġisterjali li kienet sabet provi serji kontra Pilatus Bank.
L-inkjesta kienet konkluża fl-2021, u f’Jannar 2022 kienet inqajmet "notitia criminis". Minkejja dan, il-Kummissarju tal-Pulizija baqa’ ma aġixxiex, u anke wara tfakkira xhur wara, baqa’ ma sar xejn, sakemm Repubblika fetħet il-kawža fl-2022.
Azzopardi sostna li l-Qorti waslet għall-konklużjoni li ma kienx hemm biżejjed evidenza, minkejja li kien hemm rapport maġisterjali li jikkonferma l-fatti. Huwa qal ukoll li kien hemm tendenza li tingħata aktar importanza lil min għandu aċċess għall-inkjesta milli lil dawk li huma suspettati li wettqu reati gravi.
Min-naħa tiegħu, l-avukat Ramon Bonnett Sladden mill-Uffiċċu tal-Avukat Ġenerali argumenta li l-Kummissarju tal-Pulizija ma setax jakkwista dak li qed titlob Repubblika għaliex l-akkużi relatati mal-ħasil tal-flus jistgħu jittieħdu biss mill-Avukat Ġenerali u mhux direttament mill-Korp tal-Pulizija.
Min-naħa tagħha, l-NGO, Repubblika wkoll ikkundannat id-deċizjoni tal-Qorti, b’Robert Aquilina jiddikjara li l-appell kien inevitabbli: "Qatt ma nistgħu naqblu ma’ deċizjoni li tippermetti lill-Kummissarju tal-Pulizija jinjora ordni ta’ Maġistrat ieħor."
Is-sottomissjonijiet orali dwar l-appell instemgħu f’seduta ta’ siegħa fil-Qorti tal-Appell it-Tlieta filgħodu, fejn issa jidher li l-kawża tista’ tieħu xejra aktar sensittiva minħabba l-impatt potenzjali fuq il-prosekuzzjoni tal-kawża Pilatus Bank.
