Cherise Camilleri, eks-Pulizija ta’ 28 sena minn Ħal Qormi, u Ruud Buhagiar, raġel ta’ 30 sena minn Birżebbuġa, ingħataw il-ħelsien mill-arrest nhar it-Tlieta wara li ġew akkużati separatament f’Novembru b’diversi reati ta’ natura serja, fosthom it-tnixxija ta’ informazzjoni interna dwar rejds relatati mad-droga.
Camilleri qed tiġi akkużata li tat informazzjoni kunfidenzjali dwar operazzjonijiet tal-pulizija lil partijiet terzi, filwaqt li Buhagiar qed jiffaċċja akkużi ta’ tixħim ta’ serġent tal-pulizija biex jikseb informazzjoni sensittiva dwar operazzjonijiet li kienu għaddejjin.
Matul is-seduti ta’ nhar it-Tlieta, iż-żewġ imputati ngħataw il-ħelsien mill-arrest taħt numru ta’ kundizzjonijiet stretti. Dawn jinkludu depożitu ta’ €20,000 u garanzija personali ta’ €100,000 għal kull wieħed minnhom, kif ukoll l-obbligu li jiffirmaw il-kotba tal-ħelsien darbtejn kuljum.
L-Ispetturi Christina Delia u Lydon Zammit qed imexxu l-prosekuzzjoni bil-għajnuna tal-avukati Maria Francesca Spiteri u Kevin Valletta mill-Uffiċċju tal-Avukat Ġenerali.
Camilleri qed tiġi rrappreżentata mill-avukati Arthur Azzopardi u Frank Tabone, filwaqt li l-avukati Alfred Abela u Rene Darmanin qed jidhru għal Buhagiar.