Inċident tat-traffiku bejn tliet vetturi

Ilbieraħ, għall-ħabta tan-nofs siegħa ta’ waranofsinhar, il-Pulizija ġiet infurmata b’inċident tat-traffiku fi Triq Reġjonali, Santa Venera. 

Il-Pulizija marret immedjatament fuq il-post u mill-ewwel investigazzjonijiet irriżulta li seħħ inċident bejn karozza misjuqa minn raġel ta’ 45 sena residenti Tal-Pietà, karozza oħra misjuqa minn raġel ta’ 49 sena residenti San Ġiljan u mutur misjuq minn raġel ta’ 65 sena residenti l-Imsida. 

Is-sewwieq tal-mutur ingħata l-għajnuna minn tim mediku u ttieħed l-Isptar Mater Dei fejn aktar tard kien iċċertifikat bi ġrieħi gravi. 

L-investigazzjonijiet mill-Pulizija għadhom għaddejjin.