Waqt li kien qed jixhed illum fil-Qorti it-Tabib Adrian Vella, li kien it-tabib ta' Yorgen Fenech u li llum jirriżulta illi għal xi żmien kien ta' Keith Schembri wkoll, xehed kif darba nhar ta' Ħadd l-istess Fenech ċempillu u qallu biex jiltaqa' l-Mellieħa ma' Keith Schembri. L-eks Chief of Staff f'Kastilja kien ċempillu u qallu biex imur id-dar tiegħu li tinsab fiż-żona ta' Santa Maria Estate, il-Mellieħa.
"Stennejt qisu 20 minuta u mbagħad niżel Keith," qal Vella jispjega x'ġara dakinhar. Fuq l-istruzzjonijiet ta' Fenech, Keith Schembri qal lil Vella biex jiġbor xi karti - sitt karti rashom 'l isfel li kienu fuq id-desk tal-eks Chief of Staff.
"Keith Schembri pponta lejn il-karti ..." jgħid Vella li jsostni illi dawn il-karti qatt ma daru u malli ħadhom twihom u baqa' sejjer bihom Portomaso, fejn kien hemm Fenech flimkien ma' uliedu u martu.
"Qatt ma daru l-karti. Jiena bniedem mistħi u qatt ma nindaħal fi ħwejjeġ in-nies," sostna Vella.
L-akkuża prinċipali hawnhekk hija li Vella kien il-messaġġier ta' Yorgen Fenech biex il-ħtija tal-assasinju ta' Daphne Caruana Galizia jitpoġġa fuq l-eks Ministru Chris Cardona. Huwa allegat li kien hemm ittra anonima li tpoġġi l-ħtija fuq Cardona.
Vella jispjega kif malli wasal Portomaso, Fenech ħataf il-karti minn idejh, ħares lejhom u beda jħażżeż xi ħaġa fuqhom. Jixhed illi l-intraprenditur akkużat bil-qtil tal-ġurnalista fl-2017 qal: 'Ma jistax ikun. Sabbat il-karti u qal daqshekk!'
Iktar tard, għall-mistoqsijiet tal-avukat Gianluca Caruana Curran, it-Tabib Vella jixhed kif fil-ħin li kien Portomaso Keith Schembri ċempel lil Yorgen Fenech, li ħa t-telefonata fil-privat. Vella jixhed illi din it-telefonata damet madwar tliet minuti imma hu ma jafx kinitx fuq il-karti li hu għadda.
It-tabib jispjega kif hu telaq minn Portomaso u ftit sigħat wara ġew il-pulizija jarrestawh. F'dan il-punt tax-xhieda hu jinfaqa' jibki.
Intant xħin il-pulizija kienu qed iħabbtu hu (Vella) ċempel lil Keith Schembri li qallu biex ma jiftaħx. Meta qallu li Pulizija Schembri wieġeb biex jiftaħ u ordnalu jħassar il-Whattsapp chat li kien hemm bejniethom.
(Dan l-artiklu qed jiġi aġġornat)