Bil-Filmat | Jittellgħu l-Qorti l-immigranti akkużati li ħadu sehem fir-rewwixta ta' Ħal Far
Tressqu wkoll tliet żgħażagħ mixlija li kienu huma li qajmu l-irvell fiċ-ċentru miftuħ.
More in Qrati u Pulizija
Tressqu wkoll tliet żgħażagħ mixlija li kienu huma li qajmu l-irvell fiċ-ċentru miftuħ.
Mal-100 persuna se jkunu qed jitressqu l-Qorti matul il-ġurnata b’akkużi relatati mal-protesta vjolenti tal-bieraħ f’Ħal Far.
Fost dawn il-persuni, tliet żgħażagħ ta' 17,16 u 20 sena rispettivament ġew mixlija bħala l-persuni li qajmu dan l-irvell.
Huma wieġbu mhux ħatja għall-akkużi miġjuba kontrihom filwaqt li talbu għall-ħelsien mill-arrest.
Il-prosekuzzjoni oġġezzjonat għal din it-talba minħabba l-fatt li l-akkużati ma għandhomx indirizz fiss ħlief dak taċ-ċentru miftuħ.
Il-Qorti ċaħdet it-talba għall-ħelsien mill-arrest filwaqt li ħarġet ordni ta' protezzjoni favur il-vittmi.
X'ġara pass pass...
L-ewwel li ttella' l-Qorti kien grupp ta' 20 immigranti mis-Somalja, is-Senegal, il-Guinea, il-Gambja, l-Eritrea, in-Niġerja, iċ-Chad u s-Sudan.
Dawn ġew akkużati li ma obdewx l-ordnijiet tal-Pulizija u li kisru l-paċi pubblika.
Minn dawn, 14 wieġbu ħatja. Il-bqija wieġbu mhux ħajta u talbu l-ħelsien mill-arrrest iżda din it-talba ma ġietx milqugħa.
Dawk li wieġbu ħatja ġew ordnati jagħmlu sitt ġimgħa fid-detenzjoni.Madwar
Jasal it-tieni grupp
Madwar it-3pm, wasal il-Qorti grupp ieħor ta' 24 immigrant, kollha kemm huma mis-Sudan bl-istess akkużi tal-grupp ta' qabilhom.
22 wieġbu mhux ħajta, filwaqt li tnejn biss ammettew l-akkużi.
L-etajiet tagħhom kienu jvarjaw bejn il-15 u t-38 sena.
Dawk li wieġbu ħatja ngħataw sentenza ta' sitt ġimgħat detenzjoni filwaqt li dawk li ma ammettewx l-akkużi nżammu arrestati.
Wara li ngħatat is-sentenza, żewġt irġiel riedu li jwieġbu ħatja iżda ntalbu jagħmlu dan quddiem il-Maġistrat fil-kumpilazzjoni tal-evidenza u li ż-żmien li jagħmlu taħt arrest preventiv ikun imnaqqas mis-sentenza.
Jasal it-tielet grupp
It-tielet grupp ta' 25 immigrant wasal madwar l-4pm bl-istess akkużi taż-żewġ gruppi ta' qabilhom.
Kollha kemm huma wieġbu mhux ħatja u nżammu arrestati.
Intant ftit tal-ħin ilu tressqu l-Qorti tmien persuni oħra b'akkużi simili. Huma wieġbu mhux ħatja u nżammu arrestati wkoll.
L-aħħar grupp ta' immigranti se jkun qed jitressaq il-Qorti għada filgħodu.