Id-Deputat Jason Azzopardi - fuq l-aħbarijiet fl-aħħar ġimagħtejn wara storja li dehret fuq il-gazzetta ILLUM - instab li kiser l-etika meta aċċetta rigal fil-forma ta' ħlas ta' akkomodazzjoni fil-lukanda Hilton, f'Tel Aviv. Il-gazzetta ILLUM żvelat dan nhar is-7 ta' Novembru li għadda meta rrappurtat kif f'Marzu 2017 Azzopardi kien mar l-Iżrael mas-sieħba tiegħu u li għal din il-vaganza kien qagħad f'din il-lukanda għal tliet iljieli, imħallsin minn Ray Fenech ta' Tumas Group.
Yorgen Fenech kien direttur tal-istess kumpanija.
Azzopardi kien ammetta din l-istorja u qal illi hu ma kienx konxju tal-ħlas minn Tumas Group sakemm mar biex iħallas lir-receptionist tal-lukanda. Qal ukoll illi meta ġie lura Malta xtara rigal tal-fidda lil l-istess Ray Fenech.
Intant il-Bord tal-Etika tal-Partit Nazzjonalista llejla ppubblika r-rapport dwar dan il-każ - wara li ntalab jagħmel dan mill-Kap tal-PN Bernard Grech - fl-intier tiegħu. Dan ir-rapport jispjega kif l-ebda deputat jew persuna li taqa' taħt dan il-kodiċi m'għandha qatt taċċetta rigali li minħabba l-valur jew minħabba ċirkostanzi oħrajn jista' jinftiehem illi qed joħloq obbligu, anke jekk dan ma jkunx il-każ.
Għalhekk dan l-istess bord sab lil Azzopardi ħati ta' ksur tal-etika u talab lill-Kunsill Amministrattiv biex iċanfar lil Azzopardi.
L-istess Bord jinnota wkoll iżda li minkejja dan il-ksur, dan ir-rigal ma waqqafx lil Azzopardi milli jaqdi dmiru "anke b'riskju personali, kontra l-istituzzjonaliżmu tal-kriminalità, anke meta fil-mira tal-kritika kien hemm persuni mill-istess Tumas Group."