26,000 tesserat jistgħu jivvutaw għall-Kap tal-PN; L-elezzjoni fl-ewwel ġimgħat ta' Ottubru

L-elezzjoni għall-Kap tal-Partit Nazzjonalista mistennija ssir bejn l-ewwel u t-tieni ġimgħa ta’ Ottubru u għaliha se jkunu eliġibbli li jivvutaw madwar 26,000 tesserat.

Ħabbar dan ilbieraħ iċ-Chairperson tal-Kummissjoni Elettorali tal-PN Peter Fenech waqt intervent fil-programm ‘Focus’, fuq NET FM.

Peter Fenech spjega kif it-tesserati kollha li għad fadlilhom xi pendenzi fil-ħlasijiet tat-tessera biex jagħmlu dan kemm jista’ jkun malajr, imma mhux aktar tard mill-14 ta’ Settembru.

Hu qal li l-ħlasijiet pendenti tat-tesseri se jkunu aċċettati sa għaxart ijiem qabel id-data tal-Konvenzjoni Ġenerali, jiġifieri meta t-tesserati jibdew jivvutaw.

Ħabbar ukoll li se jkunu 17 il-postijiet użati biex wieħed jivvota fihom, 15-il każin tal-PN, id-Dar Ċentrali u l-AŻAD fil-Belt Valletta.

Il-Ġimgħa u s-Sibt ta’ ġimgħa qabel l-elezzjoni se tkun qed issir l-early voting u anke se jkun hemm il-possibbilità li persuni b’nuqqas ta’ mobilità jkunu jistgħu jivvutaw qabel fid-Dar Ċentrali.

Bħalissa għadu għaddej il-proċess ta' verifika fuq iż-żewġ kandidati prospettivi.

Aqra wkoll:

• 72.4% tal-elettorat Nazzjonalista fl-2017 jafda lil Bernard Grech ... 13% biss lil Delia
• Grech ma jgħidx kif ħallas €62,000 f'taxxa u VAT li kellu pendenti fuq medda ta' snin
• 'Għaqda b'lealtà' - Il-motto ta' Delia fl-elezzjoni għall-Kap tal-PN