‘Jason Azzopardi għandu jerfa’ r-responsabbiltà tat-trasferimenti ta’ art ‘suspettużi’…’

Il-Partit Laburista appella biex jekk Simon Busuttil irid tassew governanza tajba, għandu jieħu azzjoni fil-konfront ta’ Jason Azzopardi, l-eks Ministru responsabbli mill-artijiet fi żmien l-amministrazzjoni Nazzjonalista, sabiex issa jieħu responsabbiltà dwar it-trasferiment ta’ art irregolari li ġew innotati mill-Uffiċju tal-Awditur.

“L-Awditur Ġenerali mux biss ta’ ħjiel, iżda sostna, li Azzopardi għandu jerfa’ r-responsabbiltà,” qalet is-Segretarju Parlamentari għall-ippjanar, Deborah Schembri.

Dan ħareġ fid-dawl ta’ akkuża serja li għamel l-Awditur Ġenerali dwar l-akkwist ta l-proprjetà tal-bank HSBC fi Triq Republika fil-Belt Valletta, lura fl-2011, b’argument dwar in-nuqqas ta’ trasparenza u intervent mhux ġustifikat mill-Uffiċju tal-Prim Ministru ta’ dak iż-żmien.

Dak iż-żmien, Tonio Fenech kien il-Ministru tal-Finanzi, filwaqt li Jason Azzopardi kien responsabbli mill-artijiet. L-Uffiċju tal-Awditur argumenta li kien hemm nuqqas ta’ trasparenza fil-proċess għall-akkwist tal-proprjetà. L-Uffiċju tal-Awditur  ma kisibx evidenza ta’ xo pressjoni politika f’dan il-każ, iżda nnota li kien hemm interventi, inkluż mill-Prim Ministru ta’ dak iż-żmien, Lawrence Gonzi u minn Azzopardi, dwar l-akkwist tal-proprjetà u tibdil fil-prezz tagħha.

Jason Azzopardi

Il-Ministru tal-Ġustizzja, Owen Bonnici qal waqt konferenza tal-aħbarijiet li Jason Azzopardi ma kellu ebda kredibbiltà biex jikkritika lil ħadd dwar governanza tajba, speċjalment wara li lejliet l-elezzjoni ħa personalment ħsieb trasferiment ta’ art fix-Xemxija. “Ir-rapporti tal-Awditur jittrattaw ukoll dwar ftehim fuq art b’valur ta’ €8 miljuni f’Ħal Qormi, li ngħatat għall-prezz ta’ €700,000 lill-benefattur tal-PN, u ta’ dan, Azzopardi għandu jerfa’ responsabbiltà,” qal il-Ministru Bonnici.

Iż-żewġ raporti tal-Awditur, ikkonkludew li t-trasferiment tal-art fejn kien hemm il-birrerija tal- Löwenbräu f’Ħal Qormi li sar fl-2009, sar b’negliġenza u b’nuqqas ta’ governanza serja, peress li sar bl-għaġġla u bin-nuqqas ta’ interventi neċessarji li suppost saru minn Ministri u anke b’intervent Parlamentari.