Ix-Shadow Minister għall-Edukazzjoni Jerome Caruana Cilia qed jipproponi konferenza nazzjonali dwar l-edukazzjoni biex jiġu diskussi kemm il-problemi immedjati fis-settur kif ukoll id-direzzjoni tiegħu għas-snin li ġejjin.
Waqt diskussjoni fil-programm Xtra fuq TVM, Caruana Cilia qal li l-pajjiż għandu jagħti ħarsa mill-ġdid lejn l-istrateġiji li diġà ġew ippubblikati u janalizza jekk twettqux kif kien maħsub u x’effett kellhom.
“Ejja naraw kif ġew implimentati, jekk ġewx implimentati u x’effetti kellhom,” qal.
Huwa qal li l-proposta ħarġet minn sensiela ta’ laqgħat li saru matul is-sajf ma’ edukaturi, akkademiċi, riċerkaturi, ġenituri, NGOs u studenti.
Skont Caruana Cilia, minkejja li ma kienx hemm qbil fuq kull tema, kien hemm fehma komuni li s-settur għandu bżonn viżjoni fit-tul.
Huwa qal li dan it-tħassib tqajjem ukoll minn persuni b’affiljazzjoni ċara mal-Partit Laburista, u sostna li konferenza nazzjonali għandha tiftaħ id-diskussjoni għal kull min għandu sehem fl-edukazzjoni.
Jitlob rendikont tal-istrateġiji eżistenti
Caruana Cilia rrefera għal numru ta’ dokumenti u strateġiji li ġew introdotti matul is-snin, fosthom in-National Education Strategy, id-Digital Education Strategy u l-istrateġija dwar early leaving from education and training.
Huwa qal li d-diskussjoni ma għandhiex tieqaf mal-pubblikazzjoni ta’ dawn id-dokumenti, iżda għandha tiffoka fuq dak li verament inkiseb permezz tagħhom.
Il-Ministru għall-Edukazzjoni Byron Camilleri ma qabilx mal-idea li s-settur huwa nieqes minn viżjoni, u rrimarka li l-Gvern għandu strateġija edukattiva bil-miktub għas-snin li ġejjin.
Camilleri qabel li l-edukazzjoni teħtieġ ippjanar fit-tul, u qal li d-deċiżjonijiet meħuda llum jistgħu jibdew juru l-effetti tagħhom sa 15-il sena wara.
Huwa żied li hemm bżonn aktar deċiżjonijiet biex is-sistema tkun kapaċi tilqa’ l-interessi differenti tat-tfal u toffrilhom opportunitajiet li jaqblu magħhom.
Tħassib dwar staff u appoġġ fl-iskejjel
Id-diskussjoni messet ukoll il-ġestjoni tal-iskejjel u n-nuqqas ta’ staff f’ċerti oqsma.
Caruana Cilia argumenta li xi problemi setgħu ġew antiċipati qabel ma reġgħu fetħu l-iskejjel.
Huwa semma każ ta’ kap ta’ skola li qallu li żewġ postijiet ta’ deputy head kienu għadhom vakanti minkejja li saru l-intervisti. Qal li reġa’ kkuntattja lill-kap tal-iskola ġurnata qabel id-diskussjoni u kien għadu ma kien hemm l-ebda żvilupp.
Caruana Cilia rrikonoxxa li mhux kull problema taqa’ direttament taħt il-kontroll tal-ministru, iżda qal li każijiet oħra juru ħtieġa għal ippjanar u preparazzjoni aħjar.
Huwa semma wkoll ġenituri li għadhom jistennew tweġibiet dwar learning support għal uliedhom.
F’każ minnhom, qal, ġenitur kien għadu ma jafx jekk bintu kinitx se tingħata l-appoġġ meħtieġ jew jekk kinitx se tkun tista’ tibda l-iskola.
F’każ ieħor, familja appellat minn deċiżjoni li l-appoġġ one-to-one għal binhom jinbidel f’arranġament maqsum fil-klassi, iżda skont Caruana Cilia ma kienet irċeviet la tweġiba mill-bord tal-appelli u lanqas konferma li d-dokumenti tagħha kienu waslu.
Meta l-preżentatur staqsa jekk dawn humiex aktar problemi ta’ management milli ta’ viżjoni, Caruana Cilia qal li l-ippjanar u l-ġestjoni xorta jridu jkunu parti mill-approċċ ġenerali lejn l-edukazzjoni.
Camilleri qal li l-iskejjel tal-Istat laħqu l-complement sħiħ tal-għalliema, iżda ammetta li għad hemm postijiet vakanti fost l-LSEs.
Huwa qal li aktar minn 400 learning support educator ġew ingaġġati matul is-sena li għaddiet, filwaqt li oħrajn għadhom qed jagħtu n-notice lill-impjegatur preċedenti tagħhom jew għaddejjin minn intervisti u assessments.
Ir-riżultati tal-PISA għandhom jiġu analizzati
Caruana Cilia qal li r-riżultati ta’ Malta fil-PISA għandhom ikunu wieħed mill-punti tat-tluq għal diskussjoni usa’ dwar is-sistema edukattiva.
Huwa qal li dawn ir-riżultati jinkwetawh, partikolarment fid-dawl tal-investiment sostanzjali li sar fl-edukazzjoni minn gvernijiet differenti.
Staqsa wkoll jekk il-Gvern hux qed jagħmel biżżejjed użu mir-riċerka mwettqa mill-Fakultà tal-Edukazzjoni u minn oħrajn li jaħdmu fis-settur.
Caruana Cilia semma wkoll diskussjonijiet ma’ kapijiet tal-iskejjel dwar dak li ddeskriva bħala sistema ċentralizzata ħafna, u staqsa kemm il-kunċett ta’ shared leadership imsemmi fin-National Curriculum Framework tal-2012 verament ġie implimentat.
Camilleri qal li hu wkoll mhux kuntent bir-riżultati tal-PISA, iżda argumenta li dawn ma jirriflettux is-sistema edukattiva kollha.
Huwa indika progress fl-aċċess għall-edukazzjoni, fit-teknoloġija u fl-appoġġ mogħti lil studenti li ġejjin minn sfondi soċjali u ekonomiċi aktar diffiċli.
Il-ministru qal ukoll li diġà għaddej xogħol fuq il-kurrikulu, u sostna li l-edukazzjoni għandha tħejji lit-tfal mhux biss biex jgħaddu mill-eżamijiet, iżda wkoll biex jaħsbu.
Dwar il-qari, Camilleri qabel li għandu jsir sforz akbar u qal li se jkun hemm azzjoni aktar b’saħħitha f’dan il-qasam. Huwa żied li t-teknoloġija tista’ tintuża wkoll biex tinkoraġġixxi l-qari, u semma l-użu tiegħu stess tal-ebooks.
