Il-Malta Union of Midwives and Nurses (MUMN) talbet laqgħa mal-Ministru tas-Saħħa Jo Etienne Abela dwar il-ftehim tal-Allied Health li, skont il-union, qed iwassal għal diskriminazzjoni fil-konfront tal-infermiera u l-qwiebel.
Fi stqarrija, l-MUMN qalet li l-ftehim il-ġdid jippermetti lil professjonisti fil-grad tas-Salary Scale 7 javvanzaw għal Scale 6, filwaqt li ħaddiema eżistenti fi Scale 6 jistgħu javvanzaw għal Scale 5 permezz ta’ grandfather clause.
L-union sostniet ukoll li l-ftehim wassal biex allowances li kienu jingħataw lill-infermiera u l-qwiebel jiġu sostitwiti b’ammont ta’ madwar €6,000 fuq il-gradi kollha tan-nursing u l-midwifery.
L-MUMN qalet ukoll li ħaddiema Allied Health, inklużi dawk fi Scale 5, jistgħu jagħżlu arranġament kuntrattwali biex jaħdmu sigħat addizzjonali kull ġimgħa bi ħlas fiss ekwivalenti għar-rata tal-overtime applikabbli.
Skont l-union, skemi strutturati ta’ overtime jistgħu jiġu interpretati bħala sinjal ta’ nuqqas kroniku ta’ ħaddiema fis-settur tas-saħħa, fejn minflok jiġu reklutati aktar impjegati, qed jiddependu fuq il-ħaddiema eżistenti biex jaħdmu aktar sigħat kull ġimgħa.
L-MUMN sostniet li l-infermiera u l-qwiebel illum mhux biss huma l-professjoni bl-akbar nuqqas ta’ impjegati, iżda spiċċaw ukoll l-inqas professjonisti tas-saħħa mħallsa f’Malta.
Il-union qalet li filwaqt li l-infermiera u l-qwiebel ġew miċħuda minn progressjoni fis-salarju u titjib finanzjarju, il-Ministru tas-Saħħa approva benefiċċji finanzjarji sostanzjali għal professjonisti oħra fis-settur Allied Health.
“Mhix sorpriża li ż-żgħażagħ mhux qed jagħżlu dawn il-professjonijiet bħala karriera,” sostniet il-union.
L-MUMN akkużat ukoll lill-Ministru tas-Saħħa li wettaq “tradiment” fil-konfront tal-professjonijiet tan-nursing u l-midwifery permezz ta’ dan il-ftehim.
.png)
