Il-Partit Nazzjonalista sejjaħ lill-gvern biex jippubblika l-abbozz sħiħ tal-ftehim u l-valutazzjoni tal-proprjetà relatati ma’ Manoel Island, filwaqt li wissa li l-Prim Ministru Robert Abela għaġġel biex jagħmel tħabbira pubblika qabel ma l-ftehim ġie ppreżentat fil-Parlament jew eżaminat mill-kumitat parlamentari rilevanti.
F’stqarrija, il-PN qal li Abela “reġa’ poġġa l-karrettun quddiem iż-żiemel”, u akkużah li għażel il-publiċità fuq il-proċess u punti politiċi fuq serjetà istituzzjonali.
Il-kummenti saru wara li Abela ħabbar li ntlaħaq ftehim dwar il-futur ta’ Manoel Island. Il-gżira, li tinsab taħt konċessjoni ta’ żvilupp fit-tul miżmuma minn MIDI plc, ilha fiċ-ċentru ta’ kampanja pubblika sostnuta minn residenti, għaqdiet ambjentali u organizzazzjonijiet tas-soċjetà ċivili li ilhom jinsistu li ż-żona għandha tinbidel fi spazju miftuħ għall-pubbliku aktar milli tiġi żviluppata.
Il-PN qal li kien wieqaf ma’ dawn il-gruppi mill-bidu nett, u sostna li l-gvern ma aġixxiex minn konvinzjoni iżda biss wara pressjoni pubblika qawwija u wara li l-partit iddikjara appoġġ ċar għall-idea li Manoel Island terġa’ tingħata lin-nies.
“Il-Gvern Laburista qatt ma jista’ jikklejmja dan il-mertu,” qal il-partit, waqt li żied li mhux grazzi għalih waslet din il-fażi.
Fl-istess ħin, il-PN irrikonoxxa t-tħassib tal-azzjonisti ta’ MIDI plc, u nnota li eluf ta’ persuni investew flus fil-kumpanija u għandhom interess leġittimu fir-riżultat.
Il-partit sostna li l-proċess għandu jimxi ’l quddiem b’serjetà u rispett lejn il-partijiet kollha involuti, iżda fuq kollox b’trasparenza sħiħa u protezzjoni tal-interess pubbliku.
Fil-mument li ġiet ippubblikata l-istqarrija, il-membri parlamentari fil-Kumitat tal-Kontijiet Pubbliċi kienu għadhom ma rċevewx l-abbozz tal-kuntratt jew il-valutazzjoni tal-proprjetà, u lanqas ma kienet ġiet proposta data għal laqgħa tal-kumitat.
Il-PN qal li se jkompli jappoġġja dak li jaqbel mal-aħjar interess tal-poplu Malti u Għawdxi, iżda ma jaċċettax li ftehim ta’ din l-iskala jgħaddi mingħajr skrutinju u mingħajr rispett lejn il-Parlament.
“Manoel Island għandha terġa’ tingħata lin-nies. Iżda l-pubbliku għandu wkoll id-dritt ikun jaf il-verità kollha, jara l-ftehim kollu, u jifhem eżatt x’inhu qed isir f’ismu u bil-flus tiegħu,” qal il-partit.
Il-PN żied li r-residenti tal-inħawi ilhom ibatu l-konsegwenzi ta’ żvilupp eċċessiv u nuqqas ta’ ippjanar, u sostna li l-ħolqien ta’ spazju pubbliku fuq Manoel Island mhuwiex lussu iżda neċessità nazzjonali.
Reazzjoni tal-Partit Laburista
B'reazzjoni għal dan il-partit ikkritika lill-Partit Nazzjonalista wara stqarrija li ħareġ kważi 48 siegħa wara li ġie aċċettat il-ftehim dwar il-futur ta’ Manoel Island u Forti Tigné, li għandu jwassal biex dawn l-artijiet jerġgħu lura għand il-poplu.
F’reazzjoni uffiċjali, iddeskriva d-dikjarazzjoni tal-Oppożizzjoni bħala waħda “surreali”, u akkuża lill-PN li qed jieħu pożizzjoni kontradittorja dwar il-kwistjoni.
Sostnew li kien Gvern Nazzjonalista li oriġinarjament ta l-konċessjoni lill-iżviluppaturi, u ddeskriva dan bħala “sfreġju għas-spejjeż tal-poplu”, li issa qed jiġi parzjalment indirizzat permezz tal-ftehim il-ġdid.
Skont il-Gvern, il-ftehim attwali jfisser li art li kienet ingħatat taħt amministrazzjoni preċedenti issa se tingħata lura lill-familji Maltin.
Huwa ġie nnutat ukoll li, sa inqas minn sena ilu, l-Oppożizzjoni kienet qalet li r-ritorn ta’ Manoel Island lill-pubbliku kien “ħolma sabiħa” u enfasizzat l-eżistenza ta’ obbligi kuntrattwali li kienu jfixklu tali bidla.
Il-Gvern sostna li l-Prim Ministru Robert Abela ma waqafx biss fil-livell ta’ dikjarazzjonijiet, iżda ħadem biex din il-viżjoni ssir realtà, bil-għan li “jirbaħ il-poplu”.
Il-kwistjoni ta’ Manoel Island ilha snin twal tiġġenera dibattitu politiku u pubbliku, b’sejħiet konsistenti minn diversi setturi tas-soċjetà biex iż-żona tinbidel fi spazju miftuħ għall-pubbliku.
Il-ftehim il-ġdid dwar il-futur tal-art mistennija jibqa’ suġġett ta’ skrutinju politiku fil-jiem li ġejjin
.png)
