Rapport ġdid ippubblikat minn BirdLife Malta qed iqajjem tħassib serju dwar l-istat tal-Gamiema, hekk kif dejta xjentifika reċenti tikkonferma tnaqqis kontinwu u sinifikanti fil-popolazzjoni tagħha madwar l-Ewropa.
Skont l-aħħar dejta tal-Artikolu 12 tal-Unjoni Ewropea (2019–2024), li hija meqjusa bħala l-aktar evidenza xjentifika aġġornata disponibbli, 13 minn 15-il pajjiż tul ir-rotta tal-passa ċentrali tal-Lvant – li tinkludi lil Malta – irrappurtaw tnaqqis fil-popolazzjoni tal-Gamiema. Dan it-tnaqqis jaqbeż it-23%, kemm fuq perjodu qasir kif ukoll fit-tul .
Il-Gamiema hija klassifikata bħala speċi vulnerabbli u naqset b’madwar 83% mill-1980 ’l hawn, fatt li jpoġġiha fost l-aktar għasafar li qed jonqsu b’rata mgħaġġla fl-Ewropa . Ir-rapport jindika wkoll li m’hemm l-ebda evidenza ta’ rkupru fil-popolazzjoni tagħha .
Minkejja dawn il-konklużjonijiet, Malta reġgħet fetħet l-istaġun tal-kaċċa fir-rebbiegħa għall-Gamiema mill-2022 ’l hawn, wara moratorju li kien ilu fis-seħħ bejn l-2017 u l-2021 . Ir-rapport jikkritika d-deċiżjonijiet li wasslu għal dan il-pass, u jindika li kienu bbażati fuq dejta skaduta (2013–2018) u metodoloġiji difettużi li setgħu wasslu għal interpretazzjoni żbaljata tal-istat tal-popolazzjoni .
Fil-kuntest legali, id-Direttiva Ewropea dwar l-Għasafar tipprojbixxi l-kaċċa fir-rebbiegħa, ħlief f’ċirkostanzi eċċezzjonali fejn jiġu sodisfatti kundizzjonijiet stretti. Madankollu, ir-rapport jikkonkludi li dawn il-kundizzjonijiet mhumiex sodisfatti fil-każ tal-Gamiema f’Malta .
Barra minn hekk, jiġi enfasizzat nuqqas fl-applikazzjoni tal-prinċipju ta’ prekawzjoni, li huwa fundamentali fil-liġi ambjentali tal-UE, speċjalment meta speċi tkun fi stat ta’ konservazzjoni mhux favorevoli .
Fid-dawl ta’ dawn is-sejbiet, BirdLife Malta qed titlob li l-kaċċa fir-rebbiegħa tal-Gamiema titwaqqaf immedjatament u li jerġa’ jiddaħħal moratorju ta’ mill-inqas sitt snin, flimkien ma’ konformità sħiħa mar-rakkomandazzjonijiet u l-obbligi tal-Unjoni Ewropea .
Ir-rapport jisħaq li azzjoni urġenti hija meħtieġa biex tiġi protetta din l-ispeċi u biex jingħata appoġġ għall-irkupru tagħha, f’konformità mal-evidenza xjentifika u mal-qafas legali Ewropew.
.png)
