Il-Prim Ministru Robert Abela talab lill-Kummissarju għall-Istandards fil-Ħajja Pubblika biex jiftaħ investigazzjoni dwar allegazzjonijiet miġjuba kontrih mill-Imħallef Lawrence Mintoff, inkluż fuq akkużi li huma preskritti minħabba li allegatament seħħew qabel ma twaqqaf l-Uffiċċju tal-Istandards.
F’ittra indirizzata lill-Kummissarju, Abela talab espressament biex jitneħħa t-time bar marbut ma’ ċerti allegazzjonijiet, filwaqt li qal li huwa lest jissottometti ruħu għal kull forma ta’ skrutinju. “M’għandi xejn x’nahbi,” kiteb Abela fl-ittra tiegħu.
Skont il-liġi, il-Kummissarju għall-Istandards ma jistax jinvestiga allegat imġiba ħażina li seħħet qabel it-twaqqif tal-uffiċċju. Minkejja dan, Abela qal li xorta waħda qed jitlob li dawn l-allegazzjonijiet jiġu eżaminati.
L-ittra tal-Prim Ministru ġiet wara sejħiet pubbliċi biex ikun investigat, wara li l-Imħallef Lawrence Mintoff ippubblika ittra li qanqlet kontroversja kbira u li ġiet rilaxxata nhar it-Tlieta.
Fl-ittra tiegħu, Mintoff qal li kien imsejjaħ għal laqgħa fl-Auberge de Castille mill-Prim Ministru fil-11 ta’ Frar, sabiex tiġi diskussa l-ħatra tal-Prim Imħallef. Mintoff allega wkoll li Abela, meta kien Membru Parlamentari Laburista u avukat fil-prattika privata, eżerċita pressjoni fuq impjegat tal-qorti u uża mistoqsijiet parlamentari għall-interessi professjonali tiegħu stess.
Nhar l-Erbgħa, Abela kkonferma li kien talab lill-Kummissarju għall-Istandards biex jinvestiga wkoll dawn l-allegazzjonijiet preskritti, filwaqt li tenna li jemmen fil-prinċipji tat-trasparenza u r-responsabbiltà fil-ħajja pubblika.
.png)
