Il-Kap tal-Oppożizzjoni, Alex Borg, staqsa lill-Presidenti Myriam Spiteri Debono biex tmexxi l-laqgħat kollha mal-Prim Ministru Robert Abela dwar in-nomina tal-prim imħallef li jmiss ta’ Malta.
Borg spjega li l-għan tiegħu hu li l-Presidenti sservi bħala garanti tal-proċess tal-għażla u enfasizza li l-istess metodoloġija għandha tintuża għall-għażla tal-Awditur Ġenerali.
“Nemmen li dan huwa fl-aħjar interess tal-pajjiż biex nkunu nistgħu nimxu ‘l quddiem, għax Malta trid dejjem tkun fil-quċċata tal-prijoritajiet tagħna,” qal Borg f’post fuq il-midja soċjali nhar il-Ħamis.
Il-Kap tal-Oppożizzjoni spjega li qed jagħmel dan il-pass minħabba dawk li ddeskriva bħala dikjarazzjonijiet foloz li għamel il-Prim Ministru fil-parlament nhar l-Erbgħa dwar l-iskambju kunfidenzjali tagħhom s’issa dwar il-ħatra tal-prim imħallef.
Il-Prim Ministru Robert Abela allega li n-nomina tal-Gvern tal-Imħallef Consuelo Scerri Herrera għal prim imħallef kienet appoġġjata minn Borg, li wara biddel fehmtu minħabba li seta' wassal għal qsim fil-grupp parlamentari tal-PN. Borg ċaħad dawn l-akkużi.
Borg qal nhar il-Ħamis li l-proċess tilef il-kredibilità tiegħu, bil-fokus jimxi mill-persuna li se ssir prim imħallef lejn jekk il-poplu Malti jistax jħoss fiduċja fil-mod kif il-Prim Ministru qed imexxi l-affarijiet.
Hu enfasizza li l-Presidenti hija l-iktar persuna xierqa biex tiddefendi l-Konstituzzjoni f’dawn il-kundizzjonijiet u saħaq li t-talba tiegħu ma kellhiex l-għan li tostakola jew tirrifjuta lil ħadd, iżda pjuttost biex taqdi l-interess nazzjonali u tissalvagwardja l-integrità tal-istituzzjonijiet.
Borg irrimarka li, minkejja li mgħandux fiduċja fil-kliem tal-Prim Ministru, xorta qed jistieden lil Abela biex jerġa’ lura fid-diskussjonijiet dwar iż-żewġ nomini.
Fi stqarrija nhar l-Erbgħa mill-Uffiċċju tal-President, Spiteri Debono qalet li l-gvern u l-Oppożizzjoni għandhom iwittu t-triq lejn ftehim dwar il-ħatra ta’ Prim Imħallef ġdid, “fl-interess tal-Qrati u l-Amministrazzjoni tal-Ġustizzja, is-Saltna tad-Dritt, l-Istat, u fuq kollox il-poplu tagħna”.
It-tfittxija għal Prim Imħallef ġdid ħadet daqqa ta' ħarta nhar il-ġimgħa li għaddiet meta l-Ministru tal-Ġustizzja Jonathan Attard żvela pubblikament li l-gvern kien se jinnomina lill-Imħallef Consuelo Scerri Herrera għall-kariga. Dan irrabja lill-Partit Nazzjonalista, bil-Kap tal-Oppożizzjoni Alex Borg jikteb lill-prim ministru jgħid li isem l-imħallef sar pubbliku minkejja li ma ntlaħaq l-ebda ftehim.
Intant, Abela kien qal li ż-żewġ partiti qatt ma qablu li jżommu sigrieti l-ismijiet tal-kandidati preferuti sakemm jintlaħaq ftehim. Abela mexa 'l quddiem b'mozzjoni parlamentari biex Scerri Herrera jintgħażel għall-irwol. Il-vot sar ilbieraħ u l-maġġoranza meħtieġa ta’ żewġ terzi ma nkisbitx.
Il-Prim Imħallef fil-kariga Mark Chetcuti mistenni jibqa’ fil-kariga sakemm jintgħażel is-sostitut tiegħu.
F’diskussjonijiet preċedenti, Borg kien ippropona lill-Imħallef Edwina Grima għall-kariga iżda qatt ma rċieva xejn lura mill-gvern dwar l-għażla.
.png)
