Id-domanda għall-elettriku matul il-Maltempata Harry qabżet il-500MW hekk kif ħafna nies baqgħu d-dar minħabba l-kundizzjonijiet ħżiena tat-temp li ħakmu lil Malta l-ġimgħa li għaddiet.
Il-Ministru tal-Enerġija Miriam Dalli qalet dan waqt intervista fuq il-programm Mill-Kamra, ippreżentat minn Karl Azzopardi.
Dalli qalet li d-domanda ta’ 500MW normalment ma tiġix irreġistrata matul l-istaġun tax-xitwa. Peress li l-bajja ta’ Marsaxlokk kienet fost l-agħar milquta matul il-maltempata, it-tanker tal-LNG ġie mċaqlaq għal irmiġġ ieħor skont il-proċeduri stabbiliti minn qabel. Dan wassal biex l-ebda provvista ta’ LNG ma laħqet il-faċilitajiet fuq l-art għall-produzzjoni tal-enerġija.
L-Enemalta rrikorriet għall-impjant tal-enerġija ta’ emerġenza li jaħdem bid-diżil f’Delimara. L-impjant il-ġdid, li jista’ jintuża għal massimu ta’ 500 siegħa fis-sena, jikkonsisti f’żewġ ġeneraturi li jaħdmu bid-diżil f’kontejners li jinsabu fil-konfini tal-power station ta’ Delimara.
Id-deċiżjoni li jsir investiment fl-impjant temporanju l-ġdid tħabbret pubblikament minn Dalli f’Novembru 2023, meta qalet li l-gvern kien qed jalloka €12-il miljun għal sors ta’ enerġija li jista’ jiġġenera 60MW żejda ta’ elettriku jekk waħda mill-provvisti tal-enerġija eżistenti kellha tiġi interrotta b’xi mod.
Hi qalet li l-ippjanar fit-tul tal-gvern, bħall-investiment tiegħu fil-faċilità li taħdem bid-diżil, żgura li ma jkunx hemm tfixkil kbir għas-servizzi essenzjali bħall-ilma u l-elettriku. Dwar il-ħsarat fi spazji miftuħa li jaqgħu taħt ir-responsabbiltà tagħha, il-ministru qalet li xi wħud ġew irrappurtati iżda indirizzati meta l-kundizzjonijiet għaddew.
