Iħebbu għal raġel fil-ġnien tal-Gżira u jisirquh

Raġel safa aggredit u misruq għall-ħabta ta' nofsilejl, meta l-Pulizija ntalbet l-għajnuna minħabba dak li kien għadu kemm seħħ fil-Ġnien tal-Gżira.

Mill-investigazzjonijiet irriżulta li waqt li Ġermaniż ta’ 46 sena ġie avviċinat minn żewġt irġiel u aggredewh.

Il-vittma prova jaħrab però l-aggressuri komplew isawtuh, serqulu l-baskett u ħarbu minn fuq il-post.

Minħabba l-ġrieħi li sofra, il-Pulizija talbet għall-assistenza medika. Huwa ttieħed l-Isptar Mater Dei u ġie ċċertifikat li weġġa’ ħafif.

Il-Pulizija għaddejja bl-investigazzjonijiet u bit-tfittxijiet għall-aggressuri.