Sputnik V, l-effetti sekondarji tal-Astra Zeneca u t-trattamenti kontra l-COVID-19 fuq l-aġenda tal-Parlament Ewropew

L-MEPs f’dibattitu mal-Kummissjoni Ewropea u mal-Aġenzija Ewropea għall-Mediċini (EMA) ddiskutew it-triq il-quddiem fil-ġlieda kontra COVID-19

Il-vaċċin Russu Sputnik V
Il-vaċċin Russu Sputnik V

Id-Direttur Eżekuttiv tal-Aġenzija Ewropea għall-Mediċini, Emer Cooke, ħabbret li qed jiġu riveduti numru tat-trattamenti kontra l-COVID-19 filwaqt li qed jiġu studjati l-effetti sekondarji tal-Astra Zeneca. Dawn kienu biss ftit mis-suġġetti li ġew diskussi f’dibattitu fil-Parlament Ewropew matul din il-ġimgħa.

Id-dibattitu seħħ bil-ħsieb li l-Kumitat għall-Ambjent, is-Saħħa Pubblika u s-Sikurezza tal-Ikel (ENVI) ikun aġġornat dwar l-aħħar żviluppi rigward l-evalwazzjoni u l-awtorizzazzjoni tal-vaċċin fl-UE.

Erba’ vaċċin approvati u tlieta oħra taħt proċess

“Hemm bżonn ta’ varjetà vasta ta’ vaċċin biex nagħmlu progress fil-ġlieda kontra l-COVID-19,” bdiet Cooke. Fl-introduzzjoni tagħha hi tat spjegazzjoni għaliex l-UE qed tħares biex jiġu approvati ma’ tlett vaċċin oħra.

L-EMA bħalissa qegħda fil-proċess li tevalwa tlett vaċċin ġodda; Novavax, Curevac u Sputnic V. Skont il-proċedura fil-każ ta’ Sputnic V, il-vaċċin magħmul fir-Russja, l-aġenzija diġà qed tippjana spezzjonijiet tal-post fejn qed isseħħ il-manifattura u s-siti kliniċi. 

Id-Direttur Eżekuttiv xtaqet ukoll tiċċara għadd ta’ xnigħat billi spjegat li s’issa l-Ewropa għandha erba’ vaċċin biss approvati; Pfizer, Moderna, AstraZeneca u Janssen. Din tal-aħħar, ġiet approvata fil- 11 ta’ Marzu u mistennija tasal fl-Ewropa fl-aħħar ta’ April. 

It-trattamenti promettenti kontra COVID-19 

Emer Cooke b’mod ottimist esprimiet li l-EMA qegħda ukoll tagħmel reviżjonijiet kontinwi fuq tlett trattamenti kontra l-COVID-19. Il-prodotti li qed tirreferi għalihom Cooke huma żviluppati minn Regeneron, Eli Lilly u Celltrion.  Dawn huma fost l-iktar għażliet ta’ trattament promettenti kontra COVID-19 li jaħdmu bil-'monoclonal antibodies’. 

Monoclonal antibodies huma proteini magħmula f’laboratorju li jimitaw l-abbiltà tas-sistema immunitarja li tiġġieled il-virus. Jeżistu eżempji ta’ Monoclonal antibodies li huma speċifikament diretti kontra l-COVID-19.  Dawn huma ddisinjati biex jimblukkaw id-dħul tal-virus fiċ-ċelloli umani.  

"Ipprovdejna wkoll opinjonijiet xjentifiċi lill-Eli Lilly u Regeneron ibbażati fuq reviżjoni ta’ informazzjoni preliminarja dwar l-monoclonal antibodies,” kompliet tispjega. 

Emer Cooke
Emer Cooke

Emboli tad-demm u l-Astra Zeneca:  'L-emboli qed jidhru ħafna inqas milli qed nassumu - ebda riskju speċifiku'

Bħal ma kien mistenni, Emer Cooke tkellmet fuq il-ġrajjiet kurrenti marbutin mal-Astra Zeneca. Hi spjegat li “l-emboli tad-demm qed jidhru inqas minn kemm qed nassumu, allura f'termini ta’ riskju, il-Kumitat Espert ikkonkluda li ma hemm l-ebda riskju speċifiku.”

Iktar tard fid-dibattitu hi ċċarat li permezz ta’ investigazzjoni, EMA innutaw numru żgħir ta’ każijiet ta’ emboli tad-demm. Għalkemm rari dawn kienu każijiet serji ħafna b’uħud minnhom jistgħu jkunu fatali. Dan wassal l-aġenzija biex issejjaħ b'mod urġenti għal iktar informazzjoni.

Cooke stqarret li l-aġenzija saret konxja tal-kwistjoni madwar Astra Zeneca inqas minn ġimagħtejn ilu wara li xi pajjiżi tal-EU rrapurtaw numru ta’ każijiet. Hi xtaqet tfiehem ukoll li wara li seħħew l-analiżi dettaljati mill-Kumitat tal-Valutazzjoni tar-Riskji permezz ta’ rapporti kliniċi, huma finalment bdew jifhmu x’seta’ ġara. 

F’iktar dettalI spjegat li skont l-evidenza riveduta u l-każijiet ippreżentati mill-ġimgħa li għaddiet, “aħna ma ninsabux f’pożizzjoni biex neskludu definittivament rabta bejn il-vaċċin u l-każijiet tal-emboli tad-demm. Għalhekk se nibdew investigazzjonijiet addizzjonali biex nifhmu aktar u nissorveljaw ukoll studji ta’ osservazzjoni”

Il-Kumitat tas-Sikurezza (CHMP) fi ħdan l-EMA rrakkomandaw li titqajjem kuxjenza dwar ir-riskji possibbli. Il-Kumitat spjega kif abbinat mal-prodott se jibda jkun hemm twissija dwar l-effetti sekondarji, appell biex in-nies jirrapurtaw s-sintomi filwaqt li jieħdu azzjoni skont il-gravità. Il-Kumitat tal-Mediċina Umana appoġġja din id-deċiżjoni filwaqt li ingħatat idea ta’ kif din l-informazzjoni se tasal fl-Istati Membri permezz ta’ professjonalisti u s-sit uffiċjali ta’ EMA.

L-aħħar messaġġ minn naħa ta’ Cooke kien li “irrid inserraħ ras il-pubbliku, iċ-ċittadini tal-Ewropa, li hemm sistema ta’ kontroll fis-seħħ biex tiżgura li l-vaċċin li aħna lkoll qed nirċievu huma siguri, effiċjenti u ta’ kwalità għolja.”

Emer Cooke temmet tgħid li l-Unjoni Ewropea qed taħdem fil-qrib mal-Aġenzija Regolatorja tal-Mediċini u l-Prodotti tal-Kura tas-Saħħa fl-Ingilterra għas-sempliċiment raġuni li huma diġà laqqmu 13-il miljun persuna. Dan ifisser li huma flimkien mal-Istati Uniti u l-Iżrael jafu ħafna iktar dwar l-effetti sekondarji li qed iħallu warajhom il-vaċċin

Ewropej Funded by the European Union

Dan l-artiklu jifforma parti minn sensiela jisimha Ewropej. Din parti minn inizzjattiva ta' tlett organiżazzjonijiet tal-aħbarijiet, iffinanzjata mill-Parlament Ewropew biex iqarreb iċ-ċittadini Maltin max-xogħol tal-PE u jżommhom infurmati fuq is-suġġetti li jmissulhom il-ħajja ta' kuljum. Dan l-artiklu jirrefletti l-veduti tal-awtur. Il-Parlament Ewropew mhuwiex responsabbli għall-użu li jista' jsir mill-informazzjoni hawn provduta.

More in Ewropej 2024