Il-Kap tal-Partit Nazzjonalista Alex Borg se jkun qed iċedi s-siġġu parlamentari tiegħu fil-13-il Distrett elettorali, li jkopri Għawdex, wara li ġie elett minn żewġ distretti fl-elezzjoni ġenerali.
Borg kien wieħed minn seba’ kandidati Nazzjonalisti li rnexxielhom jiġu eletti minn aktar minn distrett wieħed. Minbarra Għawdex, huwa kien ikkontesta wkoll fit-12-il Distrett, li jinkludi fost oħrajn San Pawl il-Baħar u l-Mellieħa.
Skont l-istatut tal-Partit Nazzjonalista, il-kandidati eletti minn żewġ distretti jridu jċedu s-siġġu fid-distrett fejn kisbu l-inqas persentaġġ tal-kwota fuq l-ewwel għadd.
Fil-każ ta’ Borg, huwa kiseb 262.7% tal-kwota f’Għawdex u 275.6% fit-12-il Distrett. Dan ifisser li se jżomm is-siġġu tiegħu fit-12-il Distrett u jċedi dak ta’ Għawdex.
B’dan il-pass, tinfetaħ elezzjoni każwali fil-13-il Distrett fejn Norma Camilleri u Luke Said huma l-uniċi żewġ kandidati Nazzjonalisti li għadhom eliġibbli biex jikkontestaw il-post vakanti.
Sadanittant, se jsiru wkoll diversi elezzjonijiet każwali oħra fi ħdan il-Partit Nazzjonalista.
Stephen Spiteri, li ġie elett fit-2 u t-3 Distrett, se jċedi s-siġġu tiegħu fit-3 Distrett, filwaqt li Conrad Borg Manche se jżomm is-siġġu tiegħu fl-10 Distrett u jċedi dak tal-5 Distrett.
Dan tal-aħħar jista’ jiftaħ il-bieb għar-ritorn fil-Parlament tal-eks deputat Stanley Zammit, għalkemm se jiffaċċja kompetizzjoni minn kandidati oħra.
Fis-7 Distrett se jkun hemm żewġ elezzjonijiet każwali wara li Adrian Delia u Rebekah Borg għażlu li jżommu s-siġġijiet tagħhom f’distretti oħra. Dan joħloq opportunità għal kandidati bħal Ian Vassallo Hagi u Charles Azzopardi biex jidħlu fil-Parlament.
Elezzjonijiet każwali oħra mistennija jsiru wkoll fl-10 Distrett wara li Joe Giglio u Mark Anthony Sammut iċedu s-siġġijiet tagħhom hemmhekk. Fost dawk li jistgħu jibbenefikaw minn dawn il-vakanzi hemm l-eks deputati Graziella Attard Previ, Graham Bencini u Albert Buttigieg.
L-elezzjonijiet każwali huma mistennija jiddeterminaw il-kompożizzjoni finali tal-grupp parlamentari Nazzjonalista qabel jibda uffiċjalment ix-xogħol tal-leġiżlatura l-ġdida.
