Robert Abela ġie maħtur uffiċjalment Prim Ministru ta’ Malta għat-tielet darba wara li l-Partit Laburista rebaħ l-elezzjoni ġenerali tal-2026 b’vantaġġ ta’ aktar minn 21,000 vot.
Iċ-ċerimonja tal-ħatra saret fil-Palazz tal-Granmastru fil-Belt Valletta, fejn Abela ħa l-ġurament tal-ħatra quddiem il-President ta’ Malta Myriam Spiteri Debono.
Barra l-Palazz, mijiet ta’ partitarji Laburisti mlew Triq ir-Repubblika f’atmosfera ta’ festa, b’bnadar ħomor, murtali tal-kulur u għajjat ta’ appoġġ għall-Prim Ministru.
Għaċ-ċerimonja attendew ukoll diversi deputati eletti, uffiċjali tal-Partit Laburista u persuni distinti oħra, li sellmu lill-partitarji hekk kif daħlu fil-Palazz.
Mal-wasla tiegħu, Abela ġie milqugħ b’għajjat ta’ “Robert, Robert” minn dawk preżenti, filwaqt li waqaf isellem u jirringrazzja lil-partitarji.
Il-Prim Ministru kien akkumpanjat minn martu Lydia Abela u binthom Georgia May, li mxew miegħu fost il-folla filwaqt li sellmu lill-partitarji u rringrazzjawhom għall-appoġġ tagħhom matul il-kampanja elettorali.
Il-ħatra ta’ Abela timmarka l-bidu uffiċjali ta’ leġiżlatura ġdida wara li l-Partit Laburista kiseb ir-raba’ rebħa elettorali konsekuttiva tiegħu, riżultat li kiteb paġna ġdida fl-istorja politika Maltija.
Issa l-attenzjoni mistennija ddur fuq it-tħabbir tal-Kabinett il-ġdid tal-Ministri, hekk kif il-gvern jibda t-tħejjijiet biex iwettaq il-programm elettorali tiegħu għall-ħames snin li ġejjin.
